Канада Сыртқы істер министрлігінде жұмыс істейтін қазақ қызы: Ұлымның Қазақстан намысын қорғағанын қалаймын

Канада Сыртқы істер министрлігінде жұмыс істейтін қазақ қызы: Ұлымның Қазақстан намысын қорғағанын қалаймын

Жуырда қазақстандық спорт порталдарының біріне сұхбат берген 17 жастағы Марк Уэбб есімді канадалық хоккейші Алматыда дүниеге келгенін, алдағы уақытта хоккейден Қазақстан ұлттық құрамасында өнер көрсеткісі келетінін айтқан болатын. Марктің анасы Нұргүл Канада Үкіметінде, нақтырақ айтсақ, Сыртқы істер министрлігінде сауда жөніндегі кеңесші қызметін атқарады екен. Бүгінде Канада астанасы Оттавада тұратын қандасымызбен хабарласып, әңгімеге тартқан едік. – Әлгі спорт журналисіне сұх­бат берген ұлыңыз Марк-Әсет сіздің Канада үкіметінде жұ­мыс істейтініңізді айтыпты. Ше­тел азаматына бөгде елдің үкі­мет аппаратына жұмысқа тұру оңай емес екені белгілі. Бұл қызметке қалай қабыл­дан­дыңыз? – Оттаваға келген соң, Carleton университетінің магистратура бө­ліміне оқуға түсіп, халықаралық қа­тынастар факультетінде білім алдым. Магистратурада оқып жүр­гендерге мемлекеттік қызметке ор­наласуға мүмкіндік беретін ар­найы бағдарлама бар. Жалпы, Ка­надада министрлікке жұмысқа тұру екінің бірінің қолынан келе бер­мейді. Бірақ мен әлгі бағдарлама бойын­ша конкурстан өту үшін барым­ды салдым. Жолым болып, ақы­рында Сыртқы істер ми­нистр­лігіне жұмысқа қабылдандым. Онда сату жөніндегі кеңесші қызметін ат­қарамын. Бұл министрлікте жұ­мыс істегеніме биыл алты жыл бол­ды. Канаданың өзге елдермен сау­да қатынастарын дамытуға ат­са­лысамын. Қазақстанмен байла­ныс­ты іске араласпаймын. Алайда осын­дағы Қазақстан елшілігінде жұ­мыс істейтін қазақтарға көмек­те­сіп тұрамын. Әсіресе, олардың әйел­дері ағылшын тілін жөнді біл­мейтіндіктен, ауруханаға тіркелу, мектепке қабылдану секілді мәсе­ле­лерін шешіп беремін. Сондай-ақ аудар­ма жасап беремін. Жалпы, Қа­зақ­станда жүрмесем де, елде бо­лып жатқан жайттарды сырттай ба­қылаймын. Әсіресе, жуырда өткі­зілген Парламент Мәжілісі және мәс­лихат депутаттарының сай­лауын бақыладым. Сосын панде­мия­ға байланысты елдегі эпиде­мио­логиялық ахуал туралы жаңа­лықтарды үзбей оқып тұрамын. – Тағы сол сұхбаттан білге­німіз­дей, ұлыңыз Марк-Әсеттің ар­маны – NHL (National Hockey League) лигасында өнер көрсету және туған жері – Қазақ­стан­ның ұлттық құрамасы сапында ой­нау. Қазақстандағы бапкер­лер NHL секілді әлем бойынша үздік саналатын лигада ойнау тәжірибесі бар ойыншыны құ­ра­маға қуана-қуана шақыра­ты­ны белгілі. Оның үстіне, елдегі жетекші командалардың біріне бастапқыда легионер ретінде қосылып, кейіннен азаматтық алып, бүгінде ұлттық құрама са­нында ойнап жүрген кана­далық ойыншылар жетерлік. Байқағанымдай, алдағы уақыт­та ұлыңыздың Қазақстанның намы­сын қорғайтын хок­кей­ші­лер сапына қосылғанын қа­лай­тын секілдісіз? – Иә, біз соны қалаймыз, құп­тай­мыз. Қазақстан құрамасына шақырады деп үміттеніп отырмыз. Әкесі әлгі сұхбат шыққан соң оған «Бол­­ды, сен енді Марк-Әсет Махам­бет­сің (Нұргүлдің қыз кезіндегі тегі – ред.). Қазақстанға барғанда, өз те­гіңе сай болуың керек» дейді.  Ал мен «Барыс» командасында ой­найтын боласың. «Барыс» барлығын жеңеді» деп айтып отырамын. Егер елге шақыратын болса, мен де қа­сына еріп келетін едім. Жалпы, Марк-Әсет бастапқыда Канадаға келгісі келмеген. Әкесінің жұмысы бойынша түрлі елде жүргенде Кана­даға тек еңбек демалысында келіп-кетіп жүретінбіз. Сол себепті әдепкіде Канада ұлдарыма тек туристік орын секілді көрінетін. Ар­мениядан сонда көшеміз деп шешім қабылдағанда Марк «Онда бар­ғанда біз не істейміз?» деп бар­ғысы келмейтінін айтқан болатын. Әке­сінің «Балам, онда америкалық фут­бол немесе хоккей спорты та­ны­мал. Соның біреуімен шұғыл­да­на­сың» деп айтқаны есімде. Не­гізі, Марк-Әсет хоккеймен қатар, фут­болды да жақсы ойнады, тіпті ко­манда капитаны атанғаны бар. Со­сын екі спорттың біреуін таң­дай­тын кезде, хоккеймен кәсіби түрде шұ­ғылдануға бел буды. Бірде От­тава­да Қазақстан жасөспірімдер құра­масының Чехия командасына қарсы өткізген ойынына билет пен «Қа­зақстан» деген жазуы бар шарф са­тып алып, аренада «Алға!» деп ай­қайлап, отбасымызбен жанкүйер бол­ғанбыз. Ұлдарым қазір де «Ана­шым, қазір Қазақстан құрамасы ойнай­ды! Кеттік, бірге көреміз!» деп мені өздерімен ертіп алады. Айт­пақ­шы, ұлым берген сол сұхбатты жұ­мыстағылармен бөліскенмін. Қазақстандағы Канаданың Төтенше және өкілетті елшісі Николас Брус­со оқығысы келетінін айтып, сіл­те­месін жіберуімді сұрады. Жалпы, бұл сұхбат  Қазақстан мен Кана­да­ның арасындағы сыртқы қаты­нас­тарды жақсартуға септігін тигізетін фак­тор деп айта аламын.