Әнші Сәкен Майғазиев Шымкентте басшылық қызметке тағайындалды

Шымкент қаласы мәдениет, тілдерді дамыту және архивтер басқармасы басшысының міндетін атқарушы Ханзада Есенованың  өкімімен «Шымкент қалалық мәдениет үйі» концерттік ұйымы» МКҚК директорының міндетін атқарушысы болып танымал әнші, "МузАрт" тобының мүшесі Сәкен Майғазиев   тағайындалды. Бұл туралы қала әкімінің баспасөз қызметі хабарлады. Сәкен Қордабайұлы 1975 жылғы 1 қаңтарда Түркістан облысы, Созақ ауданында дүниеге келген. 1993 ж. Ж.Елебеков атындағы Республикалық эстрада – цирк колледжінде «Соқпалы аспаптар және эстрада әншісі» бөлімі бойынша білім алған. 1997 ж. Т.Жүргенов атындағы «Өнер» академиясының «Эстрада әншісі» бөлімі бойынша білім алған. 2001 жылдан бастап «МузАРТ» тобының мүшесі. 2012 жылдан бастап - Ж.Елебеков атындағы Эстрада және цирк колледжінде ұстаз қызметін атқарды. 2018-2020 жж. аралығы Т.Жүргенов атындағы Қазақ Ұлттық өнер академиясының шығармашылық жұмыстар және халықаралық байланыстар жөніндегі проректоры қызметін атқарды. Сәкен Қордабайұлы Қазақстан Республикасының Мәдениет қайраткері, Қазақстанның еңбек сіңірген қайраткері, «Дарын» мемлекеттік жастар сыйлығы марапаттарының иегері.