Нұр-Сұлтандағы көші-қон жөніндегі ХҚО жабылады

Нұр-Сұлтандағы көші-қон жөніндегі ХҚО жабылады

Нұр-Сұлтан қаласы Иманов көшесі, 31 мекенжайында орналасқан көші-қон бойынша халыққа қызмет көрсету орталығын тарату туралы шешім қабылданды. «Азаматтарға арналған үкімет» корпорациясының мәліметінше, 1 қарашадан бастап елордада жұмыс істейтін еңбек мигранттары халыққа қызмет көрсету орталықтары арқылы тиісті рұқсат құжаттарын ала бастады. Аталған пилоттық жоба ҚР аумағында ағымдағы жылдың 22 маусымында басталған болатын. Егер бұрын еңбек қызметіне рұқсат алу немесе ұзарту үшін елордалық мигранттарға тек көші-қон ХҚО-ға жүгінуге тура келсе, енді олар рұқсатты кез келген қалалық қызмет көрсету орталығынан ала алады. Ол үшін ХҚО-лардың ақпарат жүйесі ҚР ІІМ Көші-қон қызметі жүйелерімен ықпалдасып, бастапқы және дайын құжаттарды беру тәртібі жеңілдеді. Пилоттық жоба басталғаннан бері елорданың халыққа қызмет көрсету орталықтарында еңбек қызметіне 6576 патент берілді. Естеріңізге сала кетейік, аталған көші-қон қызметі орталығы 2018 жылдың қаңтарында ашылған болатын. Мұнда «Азаматтарға арналған үкімет» мамандары көші-қон полициясының қызметкерлерімен бірге «бір терезе»қағидаты бойынша жұмыс істеген. Көші-қон қызметі орталығы ашылған сәттен бастап «еңбек мигранттарына рұқсат беру және ұзарту» мемлекеттік қызметін 42 мыңнан астам шетелдік азамат пайдаланды.