Ресейде Әлия Молдағұлованы танымал актрисамен шатастырған

Ресейде Әлия Молдағұлованы танымал актрисамен шатастырған

Санкт-Петербургте Ленинград қорғаушыларына арналған баннерге Кеңес Одағының Батыры Әлия Молдағұлованың орнына фильмде оның рөлін сомдаған актрисаның фотосын орналастырған. Баннердегі қатені жергілікті тұрғын Жанар Құсайынова байқады, - деп хабарлайды "Фонтанка"  ресурсы. "Ерлік алаңында "Ленинградтың қаһарман қорғаушылары" атты плакат пайда болды, онда басқалармен бірге Әлия Молдағұлова көрсетілген. Бірақ мәселе оның суретінің орнына бір кездері оны кинода сомдаған актрисаның суретін орналастырған", - дейді Ж.Құсайынова. Сөзінің дәлелі ретінде ол платкаттың суретін ұсынды. "Әлия Молдағұлова Ленинградтың қорғаушысы болған және ол бойжеткен кезінде қаза тапқан. Ол туралы ақпарат жабық болса түсінер едім, бірақ олай емес қой. Суреті плакатқа қойылған Айтұрған Темірова - Орта Азияда өте танымал актриса. Ол "Мергендер" фильмінде Әлия Молдағұлованың рөлін сомдады. Оның үстіне ол - тірі", - деді ол. Жанар Құсайынованың айтуынша, ол Санкт-Петербургтегі Ұлттар үйіне қоңырау шалғанда, оған: "Олар ұқсайды ғой", - деп жауап берген. Ал ұлтаралық қатынастар және көші-қон саясатын жүзеге асыру комитеті суретті тауып, жіберуді ұсынған екен. "Мұндай немқұрайдылыққа жол бермеу керек. Әсіресе, соғыс кезінде көптеген адам қаза тапқан қалада", - деді Құсайынова. Ұлтаралық қатынастар және көші-қон саясатын жүзеге асыру комитеті басылымға қате кеткенін білетіндерін және қазіргі жағдайды түзеп жатқандарын айтты. Олар баннерлердің биыл желтоқсанның басында қала көшелерінде пайда болғанын түсіндіріп, оны комитетке бағынысты Санкт-Петербургтегі ұлттар үйі орналастырғанын мәлімдеді. Әлия Молдағұлованы 1985 жылы "Мергендер" фильмінде сомдаған Айтұрған Темірова - Қырғызстанның халық әртісі.