Елордада карантинге қарамастан ірі сауда орталықтары тәулік бойы жұмыс істейді

Елордада карантинге қарамастан ірі сауда орталықтары тәулік бойы жұмыс істейді

Нұр-Сұлтан қаласының әкімі Алтай Көлгінов елорданың ірі сауда орталықтарына тәулік бойы жұмыс істеуге рұқсат берілетінін айтты. «Карантин жайында айтар болсақ, қайтадан «қызыл» аймаққа кірдік. Бұл шектеу іс-шараларын одан ары да қатаң бақылауымыз керек дегенді білдіреді. Осы уақытқа дейін жинаған тәжірибемізді ескере отырып, бірқатар іс-шара қабылдайтын боламыз. Сонымен қатар жаңа тетіктер де қолданған жөн. Мәселен, дәліздерді тарылтып, супермаркеттерге 17-00 немесе 18-00-ге дейін жұмыс істеуге рұқсат берудің логикасы дұрыс. Алайда, тәжірибе барлығы да сол уақытқа дейін сауда жасап үлгеруге тырысатындығын көрсетті және қарбалас туындайды», – деді елорда әкімі Нұр-Сұлтан қалалық мәслихатының отырысында. Осы орайда қала әкімі елорданың бас санитарлық дәрігерімен және сауда орталықтарының басшыларымен бұл мәселені шешу жолдары талқыланғанын айтты. «Енді аумағы 2 мың шаршы метрден асатын ірі сауда орталықтары тәулік бойы жұмыс істеуі үшін шешім қабылдайтын боламыз. Бұл қала тұрғындары, кез келген азамат өзіне қолайлы уақытта бара алуы үшін жасалады. Сол кезде дәліздерді тарылтпаймыз және қарбалас та болмайды. Әсіресе, Жаңа жыл қарсаңында барлығы да дүкенге барып, үйіне қажетті заттар, енді біреулер балалаларына сыйлық алғысы келеді. Сондықтан осы мәселені бірлесіп пысықтауымыз керек», – деді ол.