Қазақстанда үшінші алтын. Данияр Елеусінов - чемпион

Қазақстандық боксшы Данияр Елеусінов Рио Олимпиадасының алтын медалін жеңіп алды. 69 келіге дейінгі салмақ дәрежесіндегі финалдық жекпе-жекте Елеусінов өзбек боксшысы Шахрам Гиясовпен кездесті. Бірінші раундта өзбекстандық белсенді болған, алайда үш төреші де қазақ боксшысы жеңді деп есептеді. Ал екінші раунд Елеусіновтің дөп тиген соққыларымен есте қалды. Қорытынды раундта өзбек босшысы жағдайды оңалтуды ойлап, бар күшімен алға ұмтылған, бірақ Елеусінов оған бетпе-бет келіп, тойтарыс берді. Қазылар алқасының шешімі бойынша қазақ боксшысы 3:0 (29-28, 29-28, 29-28) есебімен жеңіске жетті. Осылайша, ол Қазақстан бокс құрамасының алғашқы, ал Қазақстанның үшінші алтын медалін жеңіп алды.  Қазақстан құрамасының қоржынында үшінші алтын. Ал жекпе-жегі бүгін болатын Әділбек Ниязымбетовке де Елеусіновтің жолын берсін деп тілейміз!