Ақтөбе облысында браконьерлерден 167 киік мүйізі тәркіленді

Ақтөбе облысында браконьерлерден 167 киік мүйізі тәркіленді

Ақтөбе облысында браконьерлерден 167 киік мүйізі тәркіленді
ашық дереккөзі
Елімізде өткен жылдан бастап экологиялық қылмыстар үшін жаза күшейтілді. Бірақ соған қарамастан браконьерлер өздерінің қылмыстық әрекеттерін жалғастыруда. Республиканың бірнеше аймағында полицейлер табиғатқа үлкен зиян келтірген қылмыскерлерді ұстады, деп хабарлайды Polisia.kz. Ақтөбе облысында тәртіп сақшылары заңсыз аң аулау фактісі бойынша күдіктілерден 167 дана киік мүйізін, бес килограмм Қызыл кітапқа енген жануардың етін, аңшылық мылтық пен 12 патронды тәркіледі. Қазіргі таңда полиция қызметкерлері киіктердің мүйізін сатып алу және оларды шетелге өткізумен айналысатын азаматтарды іздестіруде. Ал Қызылорда облысында полицейлер қарақұйрықты атып өлтірген браконьерді қамауға алды. Тәртіп сақшылары күдікті көрінген мотоцикл жүргізушісін тексеру мақсатында тоқтатқан. Көлік құралын тексеру барысында олар қарақұйрықтың ұшасын, пышақ пен мылтықты тапты. Сондай-ақ Түркістан облысының аумағында «Браконьер» жедел алдын алу іс-шарасы өткізілген бір айда табиғатты қорғау заңнамасы саласында үш экологиялық қылмыс және 159 әкімшілік құқық бұзушылық ашылды. Полиция браконьерлерден 152 килограмм заңсыз ауланған балықты, үш қайықты және 200 метрден астам балық аулау торларын тәркіледі. Табиғатты қорғау полициясының қызметкерлері Келес аудандық полиция бөлімінің учаскелік инспекторларымен бірге Сырдария өзенінде электр тоғының көмегімен балық аулаумен айналысқан жергілікті тұрғынды ұстады. Екі күннен кейін олар «қытай торларымен» балық аулаған тағы екі браконьерді құрықтады. Барлық фактілер бойынша сотқа дейінгі тергеу амалдары жүргізілуде.