Кезекші сыныпта оқитын 105 оқушы коронавирус жұқтырған

Кезекші сыныпта оқитын 105 оқушы коронавирус жұқтырған

Қыркүйектен бері кезекші сыныптарда оқитын 105 оқушыдан коронавирус анықталған. Бұл туралы ҚР ДСМ Санитариялық-эпидемиологиялық бақылау комитетінің төрайымы Айжан Есмағамбетова мәлімдеді. "Оқу жылы басталғалы оқушылар арасында коронавирус инфекциясының 250 жағдайы тіркелді, оның 105 – кезекші сыныптарда оқитын балаларда. Қашықтан оқитын балалар арасында 145 жағдай анықталды", - деді комитет басшысы. Айжан Есмағамбетованың сөзінше, өткен аптамен салыстырғанда республика бойынша сырқаттану 1,2 есе өскен. Соңғы аптада еліміздің 12 аймағында COVID-19 инфекциясын жұқтырғандар саны артты. Атап айтқанда, Нұр-Сұлтанда – 125, Шығыс Қазақстанда – 95, Алматы қаласында –79, Павлодар облысында – 79 , Солтүстік Қазақстан облысында – 74, Қарағанды облысында – 69, Атырау облысында 58 науқас анықталған. Еске сала кетейік, бұдан бұрын Павлодар облысында 3 оқушысынан коронавирус анықталған мектеп карантинге жабылғанын хабарлағанбыз. Сондай-ақ, індет жұқтырғандар санының күрт көбеюіне байланысты Қарағанды облысының Центральный ауылының шыға берісіне блокбекет қойылып, елді мекенге кіріп-шығуға тыйым салынды.