ينتەرنەت ارقىلى جۇرگىزۋشى كۋالىگىن ساتىپ كەلگەن الاياق ۇستالدى

نۇر-سۇلتاندا پوليتسەيلەر ينتەرنەت ارقىلى جۇرگىزۋشى كۋالىگىن جاساۋ قىزمەتى تۋرالى حابارلاندىرۋ جاريالاعان الاياقتى ۇستادى. بۇل جايىندا Polisia.kz باعدارلاماسىنىڭ كەزەكتى شىعارىلىمىندا ايتىلدى.

«الاياق كوشەدە ۇستالدى. ءتəرتىپ ساقشىلارى ونىڭ ءۇيىن ءتىنتۋ كەزىندە ءمور، 75 سيم-كارتا، تاعى دا باسقا زاتتاردى انىقتادى. سەنىمگە كىرۋ ءۇشىن 40 جاستاعى ەر ادام تاپسىرىس بەرۋشىلەرگە جەكە كۋالىگىن كورسەتكەن، الايدا تەكسەرىس بارىسىندا قۇجاتتىڭ بۇرىن الاياقتىڭ قۇرىعىنا تۇسكەن بوتەن ادامعا تيەسىلى ەكەنى انىقتالدى»، – دەلىنگەن ۆەدومستۆو ۇسىنعان حاباردا.

ال قىزمەت اقىسىن الاياق ەلەكتروندىق اميانعا اۋدارۋدى سۇراعان. تولەم جاسالعاننان كەيىن بايلانىسقا شىقپاعان.

ءدال وسى جۇيە بويىنشا الاياق جىل باسىنان بەرى التى ازاماتتى الداپ ۇلگەرگەن. بىراق جابىرلەنۋشىلەردىڭ سانى ودان دا كوپ بولۋى مۇمكىن.

قازىرگى ۋاقىتتا ەر ادام تەرگەۋ يزولياتورىنا قامالدى، وعان قاتىستى قر قك 190-بابى (اقپاراتتىق جۇيەنى قولدانۋشىعا قاتىستى الاياقتىق) بويىنشا سوتقا دەيىنگى تەرگەۋ جۇرگىزىلۋدە.

ەگەر ءسىز اتالمىش الاياقتىڭ قۇربانى بولساڭىز، تەز ارادا پوليتسياعا حابار بەرىڭىز: 102، 71-63-35، 71-66-10، 8-747-620-57-93.

 

ۇقساس جاڭالىقتار

Back to top button