«Праймериз» ақпараттық жүйесінде тіркелгендердің 84,2%-і өз таңдауын жасады
«Праймериз» ақпараттық жүйесінде тіркелгендердің 84,2%-і өз таңдауын жасады
Бүгін праймериздің бірінші кезеңі бойынша сайлаушылардың дауысын есептеу жұмысы толықтай аяқталды. Онлайн-дауыс беру нәтижелері белгілі. Қағаз бюллетеньдердің барлығы партияның Орталық ұйымдастыру комитетіне жеткізіліп, расталды. Бүкіл мәлімет «Праймериз» ақпараттық жүйесіне толық салынып, баршаға қолжетімді болды. Бұл туралы партия хатшысы Арман Қырықбай Facebook-тегі парақшасында мәлімдеді.
«Төрт күн бойы «Nur Otan»-ның ақпараттық жүйесінде тіркелген мүшелерінің 662 687-cі немесе 84,2%-і дауыс беруге қатысты. 581 104 партиялық онлайн-форматта дауыс берсе, ал 81 583 нұротандық дәстүрлі түрде қағаз бюллетеньмен таңдауын жасады. Осы көрсеткіштердің өзі-ақ елімізде ғана емес, бүкіл Орта Азияда тұңғыш рет ұйымдастырылған жаңа саяси құрал – праймеризге жұрттың ерекше қызығушылық танытқанын және оның өз деңгейінде өткенін айқын көрсетті.
Елбасы, партия Лидері Нұрсұлтан Назарбаев саяси доданы өткізер алдында «Праймериздің міндеті – халықтық партиялық тізімдерді қалыптастыру» деп атап өткен болатын. Праймериз нәтижесі партия Лидері қойған тапсырманың орындалуына қажетті алғышарттың нақты жасалғанын көрсетіп отыр», – деді Арман Қырықбай.
Партия хатшысының сөзінше, бастапқыда туындаған кейбір күдік пен күмәнге қарамастан, праймериз өте қарқынды да тартысты өтті. Әсіресе, додаға қатысқандар арасында жастар мен әйелдер қатары мол. Мысалы, праймеризде бақ сынауға 10 990 адам тіркелсе, олардың 36,7% - әйелдер, 29% – 35 жасқа дейінгі жастар болды. Қатысушылардың орташа жасы – 43 жас.
«Тұжырымдап айтсақ, біріншіден, партия праймериздің арқасында өз қатарластары арасынан елдің қолдауы мен сеніміне ие болған үздіктерді іріктеді.
Екіншіден, праймериз өткізу барысында партияның ауызбіршілігі артып, ортақ мақсат жолындағы мұраттас жандардың біртұтас күшіне айналды. Яғни, праймериз партияластарды бір-бірімен тығыз байланыстыратын, бірлігін бекемдейтін дәнекерлік қызмет атқарды.
Праймериз барысында халықтың назарына ұсынылған 216 сайлауалды бағдарламаның жобасы ой елегінен өткізіліп, оған 20 мыңнан астам ұсыныс жиналды. Тыңнан ой қосылып, аталған жобалар халықтық сипат иеленді.
Біз елімізде өткен праймеризде оның шет елдерде қалыптасқан классикалық үлгісіне тән белгілердің барлығы да көрініс тапқанына куә болдық. Қатысушылар арасында пікірсайыс та, тартыс та, тіпті кейде бір-бірін айыптау да ұшырасты. Бірақ бәрі де бекітілген ережеге сай, әдептен аспай өтті. Бұл жерде жеңген мен жеңілген деген жоқ. Бәрі де ұтты. Праймериз ең алдымен еліміз үшін игі іс болды», – деп жазды А.Қырықбай.
Сондай-ақ, партия хатшысы бүкіл праймериз өткізу кезеңі бойы Партиялық бақылау комитеті тыңғылықты жұмыс жасап, тәртіп бұзушылықтарға жедел назар аударып, тиісті шаралар қабылдағанын айтты. Атап айтқанда, 30-дан астам арыз бен өтініш қаралған. Праймериз өткізу ережесін бұзғаны үшін партияның 20 мүшесі жауапкершілікке тартылса, дауыстарды бұрмалау фактілері үшін 7 кандидат, праймериз өткізу ережесін сақтамағаны үшін 27 үміткер тіркеуден шығарылды.
«Жалпы, праймериз нәтижесінде Елбасы бастамасымен былтыр қолға алынған партияны «қайта жандандыру» бағдарламасы түйінделді. Партия түбегейлі жаңғырып, қатары жаңа тұлғалармен толықты. Осылайша, «Мықты лидерлер – мықты партия» қағидаты жүзеге асты.
«Nur Otan» партиясы – мемлекеттілігіміздің мызғымауын, еліміздің өсіп өркендеуін қамтамасыз етуге де бірден бір қауһарлы саяси күш. Мұны праймериз нәтижелері анық көрсетті. Партия елімізде жаңа саяси мәдениетке негіз қалады. Осынау айтулы шараға қатысқан барша үміткерді шын жүректен құттықтаймыз!», – деп түйіндеді «Nur Otan» хатшысы.