Қыздар университеті Шығыс Еуропа елдерінің халықаралық рейтингіне кірді
Қыздар университеті Шығыс Еуропа елдерінің халықаралық рейтингіне кірді
Қазақ ұлттық қыздар педагогикалық университетінің ректоры Гаухар Алдамбергенова халық алдында есеп беру кездесуін өткізді. Бұл туралы оқу орнының баспасөз қызметі хабарлады.
Жиын тікелей эфирде Zoom платформасы мен оқу орнының әлеуметтік желідегі ресми парақшаларында ұйымдастырылды. Үш сағатқа созылған кездесуде университет басшысы өткен оқу жылында атқарылған жұмыстарды жан-жақты баяндап, алдағы жоспарымен бөлісті.
«75 жыл бойы еліміздің білім беру жүйесі үшін 60 мыңнан астам маман даярлаған Қазақстанның жетекші педагогикалық жоғары оқу орындарының бірі – Қазақ ұлттық қыздар педагогикалық университеті үшін 2019-2020 оқу жылы Ұлттық университет мәртебесіндегі даму кезеңімен және елдегі төтенше жағдайға байланысты енгізілген шектеу шараларымен тұспа-тұс келді. Өткен оқу жылының екінші жартыжылдығында кездескен қиындықтарға қарамастан, университеттің академиялық саясатына сәйкес білім алушылар мен профессор-оқытушылық құрам алдындағы міндеттемелерін толық орындады», – деді Гаухар Алдамбергенова.
Осы уақыт шеңберінде университет ұжымы білім беру сапасын арттыру, ғылым жүйені жетілдіру, халықаралық ынтымақтастық, тәрбие, тұлғаның кәсіби қалыптасуы, инфрақұрылымды дамыту, кадрлық әлеуетті жақсарту бойынша үлкен жұмыс атқарды.
Атап айтқанда, Қыздар университеті алғаш рет Шығыс Еуропа және Орталық Азия елдерінің QS 301 - 350 халықаралық рейтингіне кірді. ARES жоғары оқу орындарының халықаралық рейтингінде Қазақстанның 130 жоғары оқу орны арасында 29-шы орынға ие болды.
Университетте шетелдік жоғары оқу орындарымен 60-тан астам халықаралық шарт бар. Оның ішінде 2019-2020 оқу жылында 10 өзара келісім жасалған. ҚызПУ Түркияның Нийде Омер Халисдемир университетімен, АҚШ-тың Миссисипи алқабының мемлекеттік университетімен, Польшаның Силезия университетімен, Лондонның батыс халықаралық колледжімен қос дипломды білім беру бағдарламаларын іске асыруда. 2019-2020 оқу жылында сыртқы шығыс академиялық ұтқырлық бағдарламасы аясында 48 білім алушы шетелдік серіктес жоғары оқу орындарына оқуға жіберілді.
Университет базасында 3 оқу-зертханалық ғимарат, 7 жатақхана, баскетбол, волейбол, гандбол, мини-футбол және бадминтон алаңдары, жаттығу залдары, «Аққу» жүзу бассейні, «Ұлпан» асханасы бар. Барлық жатақханаларда фитнез залдары мен сұлулық салондары жұмыс істейді.
