Пандемия кезіндегі дәрігерлер тапшылығын шешу үшін қандай шаралар жасалды – ДСМ

Пандемия кезіндегі дәрігерлер тапшылығын шешу үшін қандай шаралар жасалды – ДСМ

ҚР Денсаулық сақтау министрлігінің ресми өкілі Бағдат Қожахметов пандемия кезінде кадр тапшылығын шешу үшін 30 мың медицина қызметкері қосымша курстан өткенін айтты. «Сонымен қатар медициналық жоғары оқу орындарының оқытушылары медицина қызметкерлері үшін тұрақты түрде вебинарлар өткізуде. Соңғы 4 айдың ішінде республикалық бюджет қаражаты есебінен жұқпалы аурулардың эпидемиологиясы және биоқауіпсіздік, инфекциялық емес аурулардың алдын алу және тиімді емдеу курстары бойынша 5 мыңнан астам медицина қызметкері дайындықтан өтті. Медицина кадрларын қайта даярлау квотасы бойынша биыл 1 тамыздан бастап 45 эпидемиологпен толықтырылды. 1 қарашаға таман тағы да 205 эпидемиолог пен 165 жедел медициналық жәрдем дәрігерімен толығатын болады», – деді ол Орталық коммуникациялар қызметіндегі баспасөз мәслихатында. Сонымен қатар оның айтуынша, биыл білім беру тапсырысы аясында жұқпалы аурулар, анестезиология мен реаниматология мамандықтары бойынша 200 және 240 көлемінде мемлекеттік білім беру гранттарын ұлғайту көзделген. Ресейлік мамандарды тарта отырып, «COVID-19-дың барлық кезеңінде көмек көрсету» тақырыбы бойынша сырқаттанушылық жоғары 4 өңірдің 200 медицина қызметкері оқытылған. «Әрине, кез келген дәрігерді дайындау үшін уақыт керек. Дегенмен, індет оны күтпейді. Сондықтан медицина қызметкерлерінің санын арттыру үшін осындай қадамдарға бардық», – деді Бағдат Қожахметов.