Теңге тағы құлдырай ма?

KASE таңертеңгілік сессиясында доллар 355,92 теңгені құрады. T+0 теңге есебімен АҚШ долларының орташа сараланған бағамы бір долларға 355,92 теңгені (+5,34 теңге), ал сауда-саттық көлемі – 130 400 мың (+93 800 мың USD) АҚШ долларын құрады.

Сондықтан бүгін Алматы мен Астана қалаларының ақша айырбастау пункттерінде доллардың сатылу бағамы 1 АҚШ доллары үшін 359 теңгеге жетті.

Ұлттық валюта – теңгенің долларға қатысты бағамы – 351,05 теңгені құрады.

Өз кезегінде «Қазақстан Халық банкі» АҚ доллардың сатылу бағамы – 355,72 теңге, «Казкоммерцбанк» АҚ – 356,5 теңге, ал «БанкЦентрКредит» АҚ  – 356 теңге болды.

Ұлттық банк теңгенің құлдырауын түсіндірді. Қазақстанда 2015 жылдың тамыз айынан бастап, теңгенің еркін өзгермелі айырбас бағамы режімі енгізілген.  Соған сәйкес, теңгенің айырбас бағамы бірқатар факторлар, солардың ішінде мұнай бағасы мен саудалық әріптес елдердің валюталарының бағамына сәйкес құбылып отырады. Бұл туралы бүгін ҚР Ұлттық банкі монетарлық операциялар және активтерді басқару департаменті директорының орынбасары Әділ Мұхамеджанов мәлімдеді.

Бұл ретте теңгенің бағамына нарыққа қатысушылардың күтулері, бюджет қаражатының қозғалысы, салық төлеу кезеңдері және соңғы айлардағы – долларсыздандыру үрдісі сияқты ішкі факторлар да әсер етеді.

Сонымен қатар, ол ағымдағы жылдың шілдесінде мұнай бағасының төмендеу үрдісінің байқалғанын, оған мұнай өнімдері нарығындағы ұсыныс көлемінің өсуі, АҚШ-тағы мұнайдың жеткілікті қоры туралы деректердің жариялануы, сондай-ақ АҚШ-тағы бұрғылау ұңғымалары санының ұлғаюы да себепші болғанын атап өтті.

«Соңғы кезде рубльдің серпіні мұнай бағасының өзгеруіне сезімталдықтың төмендегенін көрсетті. Соған қарамастан, рубльдің АҚШ долларына қатысты құны мұнай бағасының құлдырауы аясында төмендеді», – деп толықтырды Ә. Мұхамеджанов. Осылайша, оның айтуынша, жоғарыда көрсетілген факторлар 2016 жылғы 26 шілдеде Қазақстан Қор биржасында теңгенің 350.2 деңгейге дейін әлсіреуіне себеп болды.

Back to top button