__باستى سلايدەرجاڭالىقتار

شاكەەۆتى تىكۇشاقپەن ىزدەۋدە

الماتىدا ءىز-ءتۇزسىز جوعالعان سافار شاكەەۆتى ىزدەۋشىلەر ەسەنتاي وزەنىنىڭ ارناسىن تەكسەرۋدى جالعاستىرۋدا. الماتى قالالىق ءىىد ءباسپاسوز قىزمەتىنىڭ حابارلاۋىنشا، بۇگىندە قوسىمشا كۇشتەر مەن رەسۋرستار تارتىلعان.  «قازىرگى تاڭدا اۋەگە ءبىر اۆياتسيا تەحنيكاسىن كوتەرۋ بويىنشا دايىندىق جۇمىستارى جۇرگىزىلۋدە. ول بەينەباقىلاۋ كامەرالارىمەن جابدىقتالعان. تىكۇشاق الماتى قالاسى مەن الماتى وبلىسى اۋماعىن ارالاپ ۇشادى. وسىلايشا، ەسەنتاي وزەنىنە ىرگەلەس جاتقان سۋ ايدىندارىنىڭ بويىن قاراپ شىعۋعا قول جەتكىزەمىز. كەيىن، بەينەباقىلاۋ كامەراسىنان الىنعان دەرەكتەردى مۇقيات زەرتتەيمىز. ءبىز بۇعان دەيىن اتتى جاساق تۋرالى ايتقان بولاتىنبىز. ىزدەۋ شاراسىنا بارلىعى بەس ات پايدالانىلۋدا.

اتتار ارقىلى ىزدەۋ شارالارىن جەدەل پوليتسيا قىزمەتكەرلەرى مەن ۋچاسكەلىك قىزمەتكەرلەر جۇزەگە اسىرىپ جاتىر. ولار شىعۋى قيىن تاۋلى جەرلەردى ارالاپ ءجۇر. ودان باسقا، وزەن ارناسىندا سۇڭۋىرلەر دە ىزدەۋ شارالارىن جۇرگىزۋدە»، – دەدى الماتى قالالىق ءىىد كريمينالدى پوليتسيا باسقارماسىنىڭ باستىعى ءارى ىزدەۋ شارالارىنىڭ جەتەكشىسى، پوليتسيا پودپولكوۆنيگى جانبولات زيادين.

ەستەرىڭىزگە سالساق، 1991 جىلى تۋعان سافار شاكەەۆتىڭ ءىز-ءتۇسسىز جوعالعانى جايلى ارىز 16 شىلدە كۇنى كەشكە 22:0-دە مەدەۋ اۋداندىق ىشكى ىستەر باسقارماسىنا كەلىپ ءتۇستى.

«ىزدەستىرۋ ءوندىرىسى اياسىندا ءبىزدىڭ بولىمشە مەن الماتى قالالىق ءىىد كريمينالدى پوليتسيا باسقارماسى وكىلدەرىنەن ارنايى تەرگەۋ-جەدەل توبى قۇرىلدى. سونداي-اق، ىزدەۋ شارالارىنا 15 شاقتى ۋچاسكەلىك پوليتسيا قىزمەتكەرلەرى جۇمىلدىرىلعان. قازىرگى تاڭدا سافار شاكەەۆتىڭ ءومىر ءسۇرۋ سالتى مەن سوڭعى ۋاقىتتا ونىڭ ارالاسىپ جۇرگەن تانىستارى تەكسەرىلىپ جاتىر.

قازىر، ءىز-ءتۇسسىز جوعالعان سافار شاكەەۆتى ىزدەۋ شارالارىنا بارلىعى 50 شاقتى پوليتسيا قىزمەتكەرلەرى تارتىلعان»، – دەدى مەدەۋ اۋداندىق ءىىب باستىعى، پوليتسيا پولكوۆنيگى ەسەن ىسقاقوۆ.

 

Back to top button