Елорда дәріханаларында дәрі-дәрмек сатуға шектеу қойылады

Халықтың дүрлігуінен кейін Нұр-Сұлтанның дәріханаларында дәрігердің рецептінсіз сатылатын препараттарды сатуға лимит қойылады.

Бұл туралы елорданың фармацевтика қауымдастығының директоры Гүлнарай Әлмурзина мәлімдеді, деп хабарлайды әкімдіктің баспасөз қызметі.

«Өткен аптадан бастап қала тұрғындары вирусқа қарсы препараттарды, азитромицин антибиотиктерін түгел сатып алды. Біз талдау жүргізіп, 41 дәрі-дәрмектің атауы көрсетілген кесте құрдық», – деді Әлмурзина.

Айтуынша, дәрігердің рецептінсіз сатылатын препараттарды реттеу туралы меморандумға қол қою туралы шешім қабылданған.

«Ол жерде халыққа қанша дәрілік препарат сатуға болатыны жазылады. Ал рецепт бойынша сатылатын дәрі-дәрмектер мен антибиотиктер, бұрынғыдай, дәрігердің нұсқауымен  беріледі», – деп нақтылады ол.

Сонымен бірге, Әлмурзина дене қызуын түсіретін дәрі-дәрмектің тапшылығын ескеріп, дәріханаларда балама нұсқалары бар екенін айтты.

Олар: «Панадол», «Эфералган», «Ибупрофен», «Ибуфен», «Миг» және «Новиган».

Қала әкімінің орынбасары Бақтияр Мәкен дәріхана желілерінің басшыларымен онлайн-жиын өткізді. Ол дәрі-дәрмек пен медициналық бұйымдарды үздіксіз жеткізуді ұйымдастыруды тапсырды.

 

Ұқсас жаңалықтар

Back to top button