__باستى سلايدەرساياسات

«نۇر وتان» پارتياسى: ەل سەنىمى – ىنتىماق كەپىلى

«نۇر وتان» پارتياسىنىڭ وڭىرلەردەگى فيليالدارى كوشپەلى قوعامدىق قابىلداۋلار جۇمىسىن جانداندىردى. پارتيا مۇشەلەرى ازاماتتاردىڭ ءوتىنىش-تىلەكتەرىنە قۇلاق ءتۇرىپ، تۇرعىن ءۇي، تۇرعىن ءۇي-كوممۋنالدىق قاتىناستار، جۇمىسپەن قامتۋ، قوعامدىق كولىك پەن جولدار جانە باسقا دا الەۋمەتتىك ماڭىزدى ماسەلەلەر بويىنشا قۇقىقتىق كەڭەس بەرۋدى جانە زاڭناما نورمالارىن ءتۇسىندىرۋدى جالعاستىرۋدا.

وتكەن اپتادا «نۇر وتان» پارتياسىنىڭ استانا قالالىق فيليالى №28 مەكتەپتە كوشپەلى قوعامدىق قابىلداۋ ۇيىمداستىردى. شاراعا «نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى مامىتبەكوۆ ەدىل قۇلامقادىرۇلى، استانا قالاسى «الماتى» اۋدانى اكىمىنىڭ ورىنباسارى سەنعازيەۆ قاسىمحان سەنعازيۇلى، قالالىق ءماسليحات دەپۋتاتى ا.ر. ورالوۆ، «الماتى» اۋدانى پروكۋرورىنىڭ ورىنباسارى يسابەكوۆ باۋىرجان، «الماتى» اۋداندىق ءىىب باسشىسى، پوليتسيا پولكوۆنيگى تولەباەۆ مارات ساعىنتايۇلى، استانا قالاسى ادىلەت دەپارتامەنتىنىڭ جەتەكشىسىنىڭ ورىنباسارى ساعىن ەربول ۇبايدوللاۇلى، استانا قالاسى جۇمىسپەن قامتۋ، ەڭبەك جانە الەۋمەتتىك قورعاۋ باسقارماسى جەتەكشىسىنىڭ ورىنباسارى جانە باسقا دا 20-دان استام مەملەكەتتىك ۇيىمدار مەن مەكەمەلەردىڭ جەتەكشىلەرى قاتىستى.

«نۇر وتان» پارتياسى استانا قالالىق فيليالى توراعاسىنىڭ ءبىرىنشى ورىنباسارى ە.مامىتبەكوۆ كوشپەلى قوعامدىق قابىلداۋلاردىڭ ماڭىزىنا توقتالدى. «بۇگىندە ەلوردا تۇرعىندارى كەڭەس الۋدا جۇگىنەتىن مەكەمە بار. ول – «نۇر وتان» قالالىق فيليالىنىڭ قوعامدىق قابىلداۋ ءبولىمى. قازىرگى ۋاقىتتا وسىنداي قابىلداۋ بولىمدەرى كەيبىر ماسەلەلەردى شەشۋدە ماڭىزدى ورىن الادى. قوعامدىق قابىلداۋ ءبولىمى – پارتيا مەن حالىقتىڭ اراسىن تىعىز بايلانىستىراتىن قۇرال. قابىلداۋ وتكىزۋ ارقىلى مەملەكەتتىك ورگاندار قاراپايىم ازاماتتاردىڭ ماسەلەلەرىمەن تانىسادى، ال قالا تۇرعىندارى وزدەرىن مازالاعان سۇراقتارعا جاۋاپ الادى. ويتكەنى تۇرعىنداردىڭ ءاربىر مەملەكەتتىك جانە جەكە مەنشىك ۇيىمداردىڭ باسشىلارىنا تىكەلەي ءوز ءوتىنىشىن جەتكىزۋگە مۇمكىندىكتەرى بولا بەرمەيدى. «نۇر وتان» پارتياسى استانا قالالىق فيليالى مەملەكەتتىك جانە جەرگىلىكتى اتقارۋشى ورگانداردىڭ قاتىسۋىمەن قالانىڭ شەتكى اۋداندارىندا جانە سايلاۋ وكرۋگتەرىندە جۇيەلى تۇردە قوعامدىق قابىلداۋ وتكىزىپ كەلەدى. كوشپەلى قوعامدىق قابىلداۋدىڭ ماڭىزدىلىعى – جەرگىلىكتى جەردە ازاماتتاردى قابىلداۋ ارقىلى ۋاقىتتى ۇنەمدەۋ، پروبلەمالاردىڭ ۋاقىتىندا جانە ءتيىمدى شەشىلۋىنە سەپتىگىن تيگىزەدى. قابىلداۋ جۇمىسىندا كاسىبي قۇقىقتىق كومەك، كەڭەستەر بەرىلىپ، زاڭنامالىق نورمالار ءتۇسىندىرىلدى. قابىلداۋ جۇمىسى مەملەكەتتىك ورگان وكىلدەرىنىڭ ازاماتتاردىڭ وتىنىشتەرىن قاراستىرۋداعى ۇقىپتىلىعى مەن جاۋاپكەرشىلىگىن ارتتىرادى، جۇيەلى ساراپتاۋ جۇرگىزىپ، ناقتى شەشىمدەر قابىلداۋعا سەبەپ بولادى. ازاماتتاردىڭ وتىنىشتەرى پارتيا تاراپىنان قاتاڭ قاداعالاۋدا بولادى»، – دەدى ە. مامىتبەكوۆ.

سونداي-اق، وتكەن اپتادا «نۇر وتان» پارتياسىنىڭ رەسپۋبليكالىق قوعامدىق قابىلداۋىندا قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ قۇرىلىمدىق بولىمدەرىنىڭ جەتەكشىلەرى ازاماتتاردى جەكە ماسەلەلەرى بويىنشا قابىلدادى. قوعامدىق قابىلداۋعا كەلگەندەردىڭ ءبىرى – استانا قالاسىنىڭ تۇرعىنى ناتاليا ابەلە جۇمىسسىزدىق بويىنشا تولەنەتىن الەۋمەتتىك جاردەماقى الۋ ماسەلەسى بويىنشا جۇگىندى. «بۇگىندە ەشقانداي الەۋمەتتىك جاردەماقى المايمىن. دەنساۋلىعىما بايلانىستى جۇمىس ىستەۋگە قابىلەتسىزبىن. كوز جانارىمنىڭ 80 پايىزىنان ايىرىلدىم. كۇندەلىكتى ءومىر سۇرۋگە از-ماز اقشا تابامىن»، – دەدى ەلوردا تۇرعىنى.

بۇل ماسەلەنى ءوز باقىلاۋىنا العان مينيسترلىكتىڭ ءتيىستى كوميتەت وكىلدەرى ن.ابەلە جۋىق ارادا الەۋمەتتىك جاردەماقى الاتىنىن جەتكىزدى. بيىلعى جىلدىڭ تامىز ايىنان باستاپ ن.ابەلە مۇمكىندىگى شەكتەۋلى ازاماتتاردىڭ قاتارىنا جاتقىزىلماق. ول مۇمكىندىگى شەكتەۋلى جانداردى جۇمىسپەن قامتۋعا باعىتتالعان وقۋ ورتالىعىنا ءوتىنىش بىلدىرگەن بولاتىن. «جۇمىسپەن قامتۋ ورتالىعىنا مۇگەدەكتىگىنە قاراماستان كەز كەلگەن ادام ءوتىنىش بىلدىرە الادى. بوس جۇمىس ورىندارى بولعان جاعدايدا سىزدەرگە حابارلاناتىن بولادى. سونداي-اق، وقىتۋ ماسەلەسى دە قاراستىرىلعان. مۇگەدەكتىك دارەجەسى بەرىلگەننەن كەيىن جۇمىسپەن قامتۋ ماسەلەسى قاراستىرىلادى»، – دەدى مينيسترلىكتىڭ وكىلدەرى.

بۇعان قوسا، قر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ ماماندارى استانا قالاسىنىڭ تۇرعىنى قاليا بايتەرەكوۆانىڭ وتىنىشىنە قۇلاق ءتۇردى. ول كامەلەتكە تولماعان مۇمكىندىگى شەكتەۋلى بالالاردى ەمدەۋ ماسەلەسى بويىنشا جۇگىندى. قاليا بايتەرەكوۆامەن تىلدەسكەن استانا قالاسى دەنساۋلىق ساقتاۋ باسقارماسى باسشىسىنىڭ ورىنباسارى نۇرعاليەۆا ساۋلە № 5 قالالىق ەمحانادا بالالارعا تەگىن ەم كورسەتىلەتىنىن ايتتى.

«نۇر وتان» پارتياسىنىڭ اقتوبە وبلىستىق فيليالىندا ءار سەنبى سايىن جەر ماسەلەسى بويىنشا قوعامدىق قابىلداۋلار جۇرگىزىلۋدە. ادەتتەگىدەي وتكەن سەنبىدە دە قابىلداۋعا كەلگەن ادامداردىڭ قويعان سۇراقتارى مۇقيات تىڭدالىپ، ۇسىنىستارى تىركەلدى.

ازاماتتاردى «نۇر وتان» پارتياسى اقتوبە وبلىستىق فيليالى توراعاسىنىڭ ءبىرىنشى ورىنباسارى ايبەك ساعيەۆ، وبلىستىق ءماسليحاتتىڭ دەپۋتاتى د.دوۆماتەنكو، وبلىستىق جەر قاتىناستارى باسقارماسىنىڭ ءبولىم باسشىسى ە.جارجانوۆ جانە تاعى دا باسقا پارتيانىڭ بەلسەندى مۇشەلەرى قابىلدادى.

اقتوبە وبلىسى ايماقتىق كاسىپوداقتار بىرلەستىگىنىڭ باس مامانى سەلباي قوجىقوۆ: «بۇگىن قابىلداۋعا كەلگەن ادامداردىڭ كوكەيتەستى ماسەلەلەرىن مۇقيات تىڭدادىق. ارينە ەڭ ءبىرىنشى ماسەلە – جەر ماسەلەسى. ءبىز زاڭعا ەنگىزىلەتىن وزگەرىستەر نەدەن تۋىندايتىنىن، قانداي ماقساتتا قابىلداناتىنىن ءتۇسىندىرىپ جاتىرمىز. وزدەرىڭىز بىلەسىزدەر، وتكەن جىلى قوعامدىق كەڭەستەر تۋرالى، قوعامدىق بىرلەستىكتەر تۋرالى زاڭ تولىقتىرىلىپ، جاڭعىرتىلدى. قۇقىقتىق مارتەبەلەر بەرىلدى. سوعان وراي كوپتەگەن جۇمىستار اتقارىلۋدا. كوپتەگەن يگى ىستەرگە «نۇر وتان» پارتياسى اقتوبە وبلىستىق فيليالى اتسالىسىپ وتىر. بۇگىن دە مىنە، قالانىڭ ورتاسىندا، «نۇر وتان» پارتياسى اقتوبە وبلىستىق فيليالى عيماراتىندا قابىلداۋ جۇرگىزىلۋدە. قابىلداۋعا ءار سالانىڭ ماماندارى كەلدى. مەن كاسىپوداقتار وكىلى رەتىندە قاتىسىپ وتىرمىن»، – دەپ قوعامدىق قابىلداۋ جۇمىسى بارىسىن اڭگىمەلەدى.

«نۇر وتان» پارتياسى اقتوبە وبلىستىق فيليالى قوعامدىق قابىلداۋ ءبولىمىنىڭ كەڭەسشىسى امانكەلدى مەكتەپباەۆتىڭ ايتۋىنشا، قوعامدىق قابىلداۋعا كەلەتىن ازاماتتاردىڭ اراسىندا جەر ماسەلەسىنەن بولەك، شاعىن جانە ورتا بيزنەس، تۇرعىن ءۇي سالۋ سىندى ءتۇرلى ماسەلەلەر بويىنشا جۇگىنەتىندەر كوپ. «وتكەن سەنبىدە قابىلداۋعا 51 ازامات كەلىپ جولىقتى. ونىڭ 21-ءى جەر الۋ كەزەگى بويىنشا، 13-ءى جۇمىس جونىندە ماسەلە قوزعادى. جەر ساتۋعا قارسىلىق ءبىلدىرىپ كەلگەن 6 ادام بولدى. قالعاندارى كاسىپكەرلىك قۇرۋ، تۇرعىن ءۇي الۋ سىندى جەكە جۇمىستارىمەن كەلدى. بۇگىن دە ادام از ەمەس. ءبارى بىردەي جەرگە قاتىستى ماسەلەنى قوزعاپ وتىرعان جوق»، – دەدى ول.

جامبىل وبلىسىنداعى نۇروتاندىقتار دا ازاماتتاردىڭ مۇڭ-مۇقتاجىن تىڭداپ، ءوتىنىش-تىلەكتەرىن قاناعاتتاندىرۋعا ايرىقشا كوڭىل ءبولىپ كەلەدى. ماسەلەن، اپتا باسىندا «نۇر وتان» پارتياسى جامبىل اۋداندىق فيليالى اۋداندىق پروكۋراتۋرامەن بىرلەسە بەساعاش اۋىلدىق وكرۋگىندە كوشپەلى قوعامدىق قابىلداۋ وتكىزدى. قابىلداۋدى «نۇر وتان» پارتياسى جامبىل اۋداندىق فيليالى توراعاسىنىڭ ءبىرىنشى ورىنباسارى نەسىپبەكوۆ نۇرلان كۇدەربايۇلى مەن اۋدان پروكۋرورىنىڭ ورىنباسارى اسىلبەكوۆ الماس ءابدىنۇرۇلى جۇرگىزدى.

قابىلداۋ بارىسىندا اۋىل تۇرعىندارى جەكە سۇراقتارى مەن اۋىلدىڭ كۇردەلى، شەشىمىن تاپپاي جۇرگەن ماسەلەلەرىن قوزعادى. اتاپ ايتساق، تۇركسىب اۋىلى، قاروي كوشەسى №1 ءۇيدىڭ تۇرعىنى جانۇزاق يساقۇلى 2016 جىلدىڭ قاڭتار ايىندا جەكە شارۋاقوجالىعىنان 3 باس ءىرى قارا مالى جوعالىپ، ءالى كۇنگە تابىلماعانىن ايتتى. ال اسا اۋىلىنان كەلگەن شەكەرباي بازاربەكوۆ مال ۇرلىعىنىڭ ءجيى ورىن الاتىندىعىن جانە وسى جايتتاردى بولدىرماۋ ءۇشىن پروكۋراتۋرا تاراپىنان باقىلاۋ كۇشەيتىلىپ، ىشكى ىستەر قىزمەتكەرلەرى تۇنگى رەيدتەر جۇرگىزسە دەگەن وتىنىشتەرىن ءبىلدىردى. ءوتىنىش يەلەرىنە زاڭ اياسىندا ءتۇسىندىرۋ جۇمىستارى جۇرگىزىلىپ، كوتەرىلىپ وتىرعان ماسەلەلەردىڭ ورىندى ەكەنىن جانە الداعى ۋاقىتتا شەشىمىن تابۋعا ىقپال ەتەتىندىكتەرى تۋرالى ايتىلدى.

قوستاناي وبلىستىق پارتيا ۇيىمىنىڭ قوعامدىق قابىلداۋ بولمەسىنىڭ ەسىگى دە نۇروتاندىقتارعا تالاپ-تىلەگىن، ارىز-شاعىمىن جەتكىزگىسى كەلگەن جەرگىلىكتى تۇرعىندارعا اركەز اشىق. ماسەلەن، سەيسەنبى كۇنى «نۇر وتان» پارتياسى جانىنداعى سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەس توراعاسىنىڭ ءبىرىنشى ورىنباسارى و.ءا. ابدىكارىموۆ قوستاناي وبلىسىنا ءىسساپارى بارىسىندا ازاماتتاردى جەكە ماسەلەلەرى بويىنشا قابىلدادى.

الدىن الا باق-تا جاريالانعان حابارلاندىرۋ بويىنشا قابىلداۋعا 14 ازامات تىركەلگەن بولاتىن. ولاردىڭ تورتەۋى مەملەكەتتىك ورگانداردىڭ ءىس-قيمىلدارىنا نارازىلىعىن ءبىلدىردى. مىسالى، قوستاناي اۋدانىنان كەلگەن ازاماتشا ل.ي. كراسنوجەنوۆا زاتوبول ەلدى مەكەنىنىڭ اكىمى مەن اۋدان پروكۋرورىنىڭ ارەكەتسىزدىگىنە شاعىمدانسا، ت.ە. رادكو «جەرعزو» رمك قف جەر تەلىمىنىڭ شەكاراسىن بەلگىلەپ بەرمەۋىنە جانە قالالىق ساۋلەت باسقارماسىنا، ف.ا. احاتاەۆ توبىل بەكەتىندە «ۆجدو» اق اتقىشتار كومانداسىنىڭ كۇزەتشىسىن زاڭسىز جۇمىستان شىعارىلعانى تۋرالى وتىنىشپەن كەلگەن. ولارعا تيىسىنشە تۇسىنىكتەمە جانە ۇسىنىستار بەرىلدى. سارىكول اۋىلىنىڭ تۇرعىنى ا.س. باگداساريان ءوزىن مىندەتتەمەسىن دۇرىس ورىندامايتىن تاۋار ۇسىنۋشى ەتىپ جاريالاعان مەملەكەتتىك مەكەمەنىڭ ۇستىنەن شاعىمداندى. وعان سوت شەشىمىمەن كەلىسپەي، باس پروكۋراتۋراعا جۇگىنۋگە، سودان كەيىن اپپەلياتسياعا بەرۋگە كەڭەس بەرىلدى. ال «ۇزىنكول اۋداندىق ءبىلىم بەرۋ» مم باسشىسىنىڭ ارەكەتىنە قوستاناي وبلىسىنىڭ پروكۋراتۋراسىنا ارىز جازۋ ۇسىنىلدى.

كەلەسى 6 ادام قۇقىققورعاۋ ورگاندارىنىڭ قاناعاتتانعىسىز ءىس-قيمىلدارىنا شاعىمداندى. ل.ا. دەحتيارەۆا قۇقىققورعاۋ ورگانىنان زاڭسىز بوساتىلعانى جانە سوزبۇيداعا سالۋشىلىق تۋرالى ءوتىنىشىن بىلدىرسە، وعان رەسپۋبليكالىق قوعامدىق كەڭەسكە جازباشا تۇردە ءوتىنىش جازىپ بەرۋى ۇسىنىلدى. ال ازامات ۆ.ا. گريتساي قوستاناي قالالىق ماي قىزمەتكەرلەرى ءوزىن زاڭسىز تۇردە جول اپاتىن جاساۋشى دەپ كىنالاۋىنا قارسىلىق ءبىلدىردى. سوت شەشىمى بويىنشا ونىڭ شاعىمى قاناعاتتاندىرىلعان. بىراق ءوتىنىش يەسىن پوليتسيا قىزمەتكەرىنىڭ بۇيرىعىن تىڭداماعانى ءۇشىن (جىلدامدىقتى شەكتەن اسىرۋ، تەمىرجولدى كەسىپ ءوتۋ، قىزمەتكەردىڭ بۇيرىعىنا قاراماستان توقتاماۋى) ايىپ تاعىلعان. بۇل كىنالار تۋرالى حاتتاما جوق. ۆ.ا.گريتسايعا سىبايلاس جەمقورلىققا قارسى ءىس-قيمىل جونىندەگى ۇلتتىق بيۋرو دەپارتامەنتىنە جازباشا تۇردە شاعىمدانۋ ۇسىنىلدى. قىلمىستىق ىستەر بويىنشا سوزبۇيدالىققا سالۋ تۋرالى وتىنىشپەن كەلگەن ن.ي. سكۆورتسوۆا، س.س. ۆوستروۆ، پ.ۆ. سامويلەنكوعا تۇسىنىكتەمە بەرىلىپ، ولاردىڭ ماسەلەلەرى قولما-قول وبلىستىق ءىىد مەن سىبايلاس جەمقورلىققا قارسى ءىس-قيمىل جونىندەگى ۇلتتىق بيۋرو دەپارتامەنتىنىڭ باقىلاۋىنا الىندى. ال ي.ي روديونوۆانىڭ قۇقىققورعاۋ ورگاندارى قىزمەتكەرلەرىنىڭ ارەكەتسىزدىگىنە شاعىمدانعان ارىزى بويىنشا وعان جاڭادان انىقتالعان جاعدايلار ناتيجەسىندە ساتىپ الۋ-ساتۋ كەلىسىمشارتىن كەرى شاقىرىپ الۋ جونىندە ازاماتتىق سوتقا جۇگىنۋ كەڭەسى بەرىلدى. جانە قوستاناي وبلىسىنىڭ پروكۋراتۋراسىنا بۇل ءىستى باقىلاۋعا الۋ ۇسىنىلدى.

قوعامدىق قابىلداۋلار جۇمىسىنىڭ جۇيەلىلىگىنە ءجىتى ءمان بەرەتىن پارتيانىڭ پاۆلودار قالالىق فيليالى دا قالا تۇرعىندارىن تولعاندىرعان ماسەلەلەردىڭ شەشىمىن تابۋعا اتسالىسىپ كەلەدى. سەيسەنبى كۇنى پاۆلودار قالاسىنىڭ پروكۋرورى ەرجان بولەگەنوۆ «نۇر وتاننىڭ» پاۆلودار قالالىق فيليالىندا ازاماتتاردى جەكە ساۋالدارى بويىنشا قابىلدادى.

پروكۋرورعا كەلىپ تۇسكەن سۇراقتاردىڭ ىشىندە جالاقىسىن الا الماعان قۇرىلىسشىلار بريگاداسىنىڭ ۇجىمدىق ءوتىنىشى بولدى. ءوتىنىش بەرۋشىلەر اقسۋ قالاسىندا بىرقاتار جۇمىستاردى اتقارعانىمەن، جۇمىستاردى الدىن-الا ەڭبەك كەلىسىم-شارتىن جاساماي ورىنداعان. وسى سەبەپتى داۋلى جاعداي ورىن الدى. پروكۋرور قۇرىلىسشىلاردىڭ جازباشا ءوتىنىشىن قابىل ەتىپ، بۇل ماسەلەنى ەگجەي-تەگجەيلى زەرتتەۋدى قولعا الاتىنىن ايتتى.

الداعى ۋاقىتتا دا «نۇر وتان» پارتياسى قوعامدىق قابىلداۋلار جۇمىسىن جالعاستىرىپ، حالىقپەن بايلانىستى نىعايتا تۇسپەك.

 

انار لەپەسوۆا

Back to top button