Jañalıqtar

ŞQO-da karantin rejimi qaşan ayaqtaladı – äkim aytıp berdi

Şığıs Qazaqstan oblısında 12-mamırdan bastap Semeyden özge barlıq qalalar men audandarda kezeñ-kezeñmen jwmıs rejimine köşu bastaladı. Bwl turalı aymaq basşısı Danial Ahmetov öziniñ Instagram-paraqşasında jazdı.

«Der kezinde qabıldanğan şaralar men twrğındardıñ tanıtqan jauapkerşiliginiñ arqasında Şığıs Qazaqstanda basqa aymaqtarğa qarağanda COVID-19 virusın jwqtıru deñgeyi aytarlıqtay tömen ekeni belgili. Pandemiyanıñ alğaşqı künderinen bastap bizdiñ mejege alğan bastı maqsatımız – öñir halqınıñ ömiri men densaulığın saqtau. Sondıqtan koronavirustıñ jaña jağdaylarınıñ bolmauına kepildik beretin tiisti şaralardı qabıldaymız», – deydi äkim.

Onıñ aytuınşa, ŞQO karantinnen kelesi retpen şığadı: 12 mamırda Semeyden özge barlıq qalalar men audandarda kezeñ-kezeñmen jwmıs rejimine köşu bastaldı. Büginde 500 şarşı metrden aspaytın azıq-tülik emes tauarlardıñ köterme jäne bölşek sauda ob'ektileri, sonday-aq, swlulıq salondarı, gül dükenderi jwmısqa kirisken.

«18 mamırdan bastap komp'yuterlik, twrmıstıq tehnikalardı satu jäne jöndeu salondarı aşıladı. Bwl sanatqa qwrılıs materialdarın bölşek satumen aynalısatın sauda orındarı, avtosalondar, lombardtar, kir juu jäne himiyalıq tazalau käsipkerlik nısandarı kiredi. Bwdan bölek, aşıq alañdağı sport nısandarı, qaşıqtan jetkizu jäne tamaqtı özimen birge alıp ketu şartımen qoğamdıq tamaqtanu orındarı iske kirisedi. Aldın ala kezekti brondau tärtibi boyınşa HQKO jwmısı bastaladı», – deydi Danial Ahmetov.

Sayajayğa jwp, taq künderi, senbi, jeksenbi jäne mereke künderin qosa alğanda baruğa rwqsat berilgen.

«Jağday jaqsarğan jağdayda, rwqsattama boyınşa qozğalıs rejimi toqtatıladı. Qauipti viruspen küres ayaqtalmağandıqtan, sizderden öz igilikteriñiz üşin betperde kiip jürudi, äleumettik qaşıqtıqtı qatañ saqtaudı swraymın. Jwmıs rejimine köşudiñ barlıq kezeñderi oblıstağı epidemiologiyalıq ahualğa baylanıstı bolatının erekşe atap ötkim keledi. Jalpı, karantin rejimin ayaqtau, qalıptı tınıs-tirşilikke oralu mausımnıñ basına boljanıp otır», – deydi aymaq basşısı.

Back to top button