95 жастағы соғыс ардагеріне темір тұлпардың кілті табысталды

95 жастағы соғыс ардагеріне темір тұлпардың кілті табысталды

95 жастағы соғыс ардагеріне темір тұлпардың кілті табысталды
ашық дереккөзі
Күршім ауданының әкімі Дулат Қажанов Ұлы Жеңістің 75-жылдығы аясында соғыс ардагері Ахметкәрім Ахмадиевтің шаңырағында болып, мерекемен құттықтады. Бұл туралы ШҚО әкімдігінің баспасөз қызметі хабарлады. Қарт майдангердің соғыстағы ерліктері мен бейбіт жылдардағы еңбектері, сондай-ақ ел Тәуелсіздігін нығайтуға қосқан үлесі ұшан теңіз, бүгінгі жас ұрпаққа өшпес өнеге. Аудан әкімі Ахметкәрім ақсақалға мемлекет басшысы Қ.К. Тоқаевтың және облыс әкімі Д.К. Ахметовтың арнайы құттықтау хаттарын оқып, сый-сияпатын табыстады. Сондай-ақ, аудан басшысының бастамасымен және жергілікті кәсіпкерлер қолдауымен қаһарман қарт майдангерге жаңа темір тұлпар сыйға тартылды. "Ел басына күн туған сұрапыл соғыс жылдары адам төзгісіз қиыншылықтарды қайыспай көтеріп, елдің қорғаны болғандарыңыз үшін Сіздерге бас иеміз. Еліміздің бүгінгідей бейбіт заманда жеткен барлық жетістіктерінің артында Сіздердің еңбектеріңіз бен ерліктеріңіз тұр. Біз мұны мәңгі есте сақтаймыз және мақтан тұтамыз", - деді Дулат Қажанов өз құттықтау сөзінде. Майдангер Ахметкәрім Ахмадиев 1925 жылдың 12 тамызында Шығыс Қазақстан облысы, Самар ауданы, Саршоқы ауылында дүниеге келген екен. Әкесі Қайыңды орман шаруашылығының басшысы, ағаштан түйін түйген шебер адам болыпты. Шешесі үй шаруасында, бала тәрбиесімен отырған. Сол бір жылдары қазақ даласы жазалауды, аштықты, жұқпалы аурумен ауырғанды басынан өткізген еді, тағдыр тауқыметі оүш жасында жетім қалған баланы да айналып өтпеді. 1939 жылы ол бастауыш мектепте 7 сыныпты бітіреді. Мектепті аяқтаған кейін колхозға жұмысшы болып істеген. 1943 жылдың 2-інші ақпанында әскер қатарына Забайкальеға шақырылады. Ахметкәрім Ахмадиевтің жауынгерлік жолын кеудесі толы орден, медальдардан да көруге болады, атап айтқанда «Жапонияны жеңгені үшін» 1946 ж, «Отан соғысы» II дәрежелі ордені және тағы басқа марапаттары. 1950 жылы соғыс аяқталғаннан кейін әскерден қайтқан солдат өз туған жеріне оралады. Ахметкәрім аға жұбайы Шөкенмен бірге 6 бала өсіріпті. Қазір 17 немере, 11 шөбересі өсіп келеді. 2007 жылы Ахметкәрім Ахмадиевке «Күршім ауданының Құрметті азаматы» атағы берілген. Өз кезегінде соғыс ардагері ризашылығын білдіріп, ақ батасын берді. Ф Жалпы Күршім ауданынан 9 мыңнан астам адам соғысқа аттанған. Олардың 5 мың 400 –ден астамы қаза болды, 2246 жауынгер  хабарсыз кетті. 4 жерлесіміз Кеңес Одағының батыры атағына ие болды. Биылғы Ұлы Жеңістің 75-жылдығы аясында аудан бойынша 1 соғыс ардагеріне - 600 мың теңге, 3 ҰОС қатысушыларының жесірлері мен 6 ерен еңбегі үшін марапатталғандарға – 100 мың теңгеден және 221 тыл еңбеккерлеріне 42 500 теңгеден берілді. Жалпы 10 млн. 892 мың теңге көлемінде әлеуметтік төлем жүргізілді