Карантин режимін жеңілдету: Алматы қаласының ішіндегі посттар алынып тасталды

Алматы Полиция департаменті қала ішінде орналастырылған тосқауыл (фильтрация) посттарын алып тастады, деп жазды ҚазАқпарат. Бұл карантиндік режимнің жеңілдеуіне, сондай-ақ көптеген нысандардың жұмысын қайта қалпына келтіруге байланысты болып отыр. Қалалық полиция басым ресурсын азаматтардың көп шоғырланған жерлеріндегі (кішігірім саябақтар, алаңдар) тәртіп пен карантин режимін сақтауды бақылауға бағыттамақ. Сондай-ақ, бұл қызметкерлер жаяу патрульдеу жұмыстарына қатысады. Полиция жеке қауіпсіздік үшін карантиндік ережелер мен санитарлық-эпидемиологиялық нормалардың қатаң сақталуын ескертеді. 30 наурызда Алматы полициясы қаланың ішінде 26 полиция бекетін ұйымдастыру туралы шешім қабылдаған болатын. Төтенше жағдайдың режимін қасақана бұзған автокөлік иелері әкімшілік жауапқа тартылған болатын.