15 мың теңге: коммуналдық қызмет үшін берілетін төлемді қалай алуға болады?

Коммуналдық қызмет үшін 15 мың теңге төлеуге өтінім қабылдау әкімдіктер арнайы жүйені іске қосқан соң басталады. Бұл туралы ҚР Индустрия және инфрақұрылымдық даму министрлігінің Telegram каналында жазылды.

«Коммуналдық қызметтерді жеткізушілердің шығынын өтеу тәртібі биыл 18 сәуірде бекітілді және бүгінгі таңда әкімдіктер өтінімдерді қабылдау үшін call-орталықтар мен ақпараттық ресурстар құру бойынша шұғыл шаралар қабылдап жатыр. Әкімдіктер өтінімдерді қабылдайтын арнаулы жүйені дайындағаннан кейін, ол туралы жергілікті халықты хабарландырады. Бұл жұмыс мейлінше қысқа мерзім ішінде жүргізіледі. Сондықтан өтінім беру үшін әкімдіктерден тиісті ақпаратты күту қажет», – делінген хабарламада.

Сондай-ақ, мемлекет биылғы сәуір және мамыр айлары үшін коммуналдық қызметтерге ақы төлейді, сондықтан өтінім беруге асықпау қажет. Өйткені барлық өтініштер мамыр айын қоса алғандағы кезеңде қабылданады. Өтінімдер call-орталықтар мен ақпараттық жүйелер арқылы қабылданады. Әкімдіктерге тұтынушының жеке сәйкестендіру нөмірін, әлеуметтік мәртебесін және есепшотының деректерін ұсыну қажет.

Естеріңізге сала кетейік, Қазақстан Республикасы Президентінің тапсырмасын орындау мақсатында Индустрия және инфрақұрылымдық даму министрлігі Төтенше жағдай кезеңінде коммуналдық қызметтерді жеткізушілердің шығынын өтеу қағидаларын бекітті.

Back to top button