Бір әулеттен 20 ұстаз
Бір әулеттен 20 ұстаз
Түркістан қаласынан Қазақстан педагогика акедемиясының профессоры, Халықаралық Жазушылар Одағының мүшесі Әлима Пашанова, Түлкібастан мәдениет майталманы, ақын Бақытжан Байжұма және осы жолдардың авторы ұстаздар әулетіне сәлем бере барғанда Әбдіқайым Ысқақ ағамыз жайдары көңіл күймен қарсы алды. Дәл осы күнге орайластырылған мерейтой төтенше жағдайға байланысты тоқтатылыпты. Ешуақытта өзін биікпін демеген ардагер ұстаз қанша ел құрметтісі атанса да, мансапқұмарлық, тәкаппарлық дегенді мүлдем білмеген жан. Осы әулеттен ата жолын қуған 20 мұғалім шыққан екен. Біреуді артық, біреуді кем санамай, жұрттың бәрін құрметтейтін көкірегі қазынаға толы қарияны көрдік. Кезінде тынымсыз еңбегінің нәтижесінде 30 жылда білім ұясын республика көлеміне танытқан Әбдіқайым ақсақалдың үстінен бірде-бір рет арыз айтылып, шағым түспеген екен. Парламент тарихында аты алтын әріппен жазылған, тұңғыш қазақ тіліндегі заңның авторы Әкім Ысқақтай ұлды тәрбиелеген ардақты әкеге, ел ықыласына бөленген нар тұлғалы қария ұстазға елдің айтар алғысы шексіз. Ұл-қыздары, келіндері Кәрім-Зағипа, Забира, Гүлжан, Гүлмира, Ғали-Қарлығаш, Сакен – Гүлжазира, Нұрдәулет – Забираның ынтымағы жарасқан, бір-бірін іштей ұғысқан тәрбиесіне тәнті болдық. Бұл да өмір азығын, көңіл жазығын сыйлаған ата, әке өнегесі екені айдан анық. Кезінде Президентіміздің өзі Алғысхатын жолдаған ардақты ардагерге «Қазақстанның ұлағатты ұстазы» медалімен марапатталғанын жеткізіп, табыс еттік. Ұлағатты ұстаздың сонда берген «Нағыз бақыт – өзге үшін өмір сүруің, ұрпақтарыңа қуаныш сыйлай білуің! Сендерге осы бақытты тіледім» деген батасын біздер қуана қабылдадық. Жапон халқы «Күлкі естілген үйге бақыт келеді» дейді екен. Қара шаңырақтағы шөберелерінің шат күлкісі атасына күш-қуат беретінін аңғардық. Берекесі шалқыған, ырысы тасыған, бақыты баянданған әулеттің әз тіршілігіне қанығып, көңіліміз тоғайып қайттық.
Роза ЕСЕНГЕЛДИЕВА
Шымкент қаласы