«اتبايدىڭ شايقاسى» ياكۋتسك كينوفەستيۆالىندە باس جۇلدەنى يەلەندى

رەجيسسەر ءادىلحان ەرجانوۆتىڭ «اتبايدىڭ شايقاسى» ءفيلمى VI ياكۋتسك حالىقارالىق كينوفەستيۆالىنىڭ «ۇزدىك ءفيلمى» اتاندى. باستاپقىدا فەستيۆالدى 18-22 ناۋرىز ارالىعىندا ياكۋتسك قالاسىندا تولىققاندى فورماتتا وتكىزۋ جوسپارلانعان بولاتىن، الايدا كوروناۆيرۋس ىندەتىنە بايلانىستى ونى جابىق رەجيمدە وتكىزىپ، تەك قازىلار القاسى ءۇشىن قاتىسۋشى فيلمدەردىڭ كورسەتىلىمى ۇيىمداستىرىلىپ، جەڭىمپازداردى جاريالاۋ تۋرالى شەشىم قابىلداندى. حالىقارالىق قازىلار القاسىن رەسەيلىك كينورەجيسسەر بوريس حلەبنيكوۆ  باسقاردى، سونداي-اق قازىلار القاسى قۇرامىنا رەجيسسەر ەدۋارد نوۆيكوۆ پەن ەللا مانجەەۆا كىردى.

«جەڭىمپاز فيلم «اتبايدىڭ شايقاسى»  – بۇل اركەلكى كەيىپكەردىڭ تاڭعالارلىق وقيعاسى، باسىندا ول جاعىمسىز بوپ كورىنگەنىمەن، سوڭىنا قاراي ونىڭ قايعىلى ءومىرىن تۇسىنە، سەزىنە باستايسىڭ. قاراپايىم وقيعا وتە كەرەمەت تىلمەن ايتىلعان. بۇل وقيعانىڭ ايتىلۋ مانەرىنىڭ وزىندە ءبىر سيقىر جاتىر. ارينە بۇل باستى جۇلدە»، – دەپ باعالادى قازىلار القاسىنىڭ توراعاسى بوريس حلەبنيكوۆ.

«فەستيۆال كومانداسى مەن باعدارلامالىق ديرەكتور الەكسەي مەدۆەدەۆكە العىسىم شەكسىز! مۇنداي قيىن ۋاقىتتا كينو مەن ونەر ءۇشىن كۇرەسەتىن ناعىز جاناشىرلار بار ەكەنىن مويىنداۋىمىز كەرەك. سونىمەن بىرگە، قازىلار القاسىنىڭ بارلىق مۇشەلەرى مەن مەنىڭ سۇيىكتى رەسەيلىك رەجيسسەرلەرىمنىڭ ءبىرى بوريس حلەبنيكوۆكە «اتبايدىڭ» جەڭۋىنە مۇمكىندىك بەرگەنى ءۇشىن راحمەت. سونداي-اق ءفيلمنىڭ بۇكىل كومانداسىن وسى جەڭىسپەن قۇتتىقتايمىن جانە بارشاڭىزعا دەنساۋلىق تىلەيمىن!» – كينوكارتينا رەجيسسەرى دەدى ءادىلحان ەرجانوۆ.

Short Brothers جانە Arizona Productions كومپانيالارىنىڭ قاتىسۋىمەن Sunny Production كومپانياسى جاساعان كارتينانىڭ الەمدىك پرەمەراسى وتكەن جىلى 35-ءشى ۆارشاۆانىڭ حالىقارالىق كينوفەستيۆالىنىڭ نەگىزگى كونكۋرستىق باعدارلاماسىندا وتكەن بولاتىن. ءفيلمنىڭ باس پروديۋسەرى اسەل سادۋاقاسوۆا كارتينادا باستى رولدەردىڭ ءبىرىن ورىنداپ شىقتى.

«اتبايدىڭ شايقاسى» ءفيلمى ارالاس جەكپە-جەك بويىنشا تۋرنيرگە قاتىسۋعا بەل بۋعان كوشە بۇزاقىسى اتبايدىڭ (اكتەر دانيار الشينوۆ) ءومىرى جايلى باياندايدى. ول بۇل تۋرنيردە جەڭىسكە جەتۋدى كوزدەيدى،  ويتكەنى ول ءۇشىن بۇل جەڭىس – جاڭا ءومىر باستاۋ، ۇلكەن سپورتقا قايتا ورالۋ جانە ءوزىنىڭ سۇيىكتىسى ايدانى (دينارا باقتىباەۆا) قايتارۋ مۇمكىندىگى.

ۇقساس جاڭالىقتار

Back to top button