Қазақстандық қарттарға азық-түлік қоржыны жеткізіледі
Қазақстандық қарттарға азық-түлік қоржыны жеткізіледі
RG Brands компаниясының өнімдері бар 5 мың қоржын Қазақстанның 18 қаласындағы жасы ұлғайған адамдарға жеткізіледі. Бұл туралы Алматы қаласы әкімдігінің баспасөз қызметі хабарлады.
Компания өнімдерін қарттарға жеткізу жұмыстарымен айналысатын еріктілер тобы қоржындарды үйді-үйге байланыссыз әдіспен жеткізбек.
«Сіз үйде қалыңыз. Біз сіздерді жақсы көреміз және аялаймыз» дей отырып, осы бастаманы қолға алып жатырмыз. СOVID-19 пандемиясынан аға ұрпақты сақтап қалу жағына ерекше назар аудару қажет деп санаймыз. Карантин және шектеулі қозғалыс кезінде біз сіздерді қорғап, сіздердің денсаулықтарыңызға қамқорлық жасағымыз келеді», — дейді компания өкілдері.
Компания еліміздегі түрлі қауымдастықтар мен белсенді адамдарды қарттарға жақсылық жасау эстафетасын қолдауға шақырады.