Алмас Сырғабай, суретші: Біздің ұлттық кодымыз тегімізде сақталған
Алмас Сырғабай, суретші: Біздің ұлттық кодымыз тегімізде сақталған
– Мұқағали ақынның өлеңдері мен поэмаларының иллюстрациясын жасадыңыз, кітаптарын безендірдіңіз, портретін жасадыңыз. Мұқағали тұлғасына деген қызығушылығыңыз қай кезден басталды?
– Сурет өнеріне деген құштарлығым бала кезімде «Балдырған» журналы, «Ұлан» газетіне басылған суреттерді көшіріп салудан басталды. Біздің Райымбек ауданында ақпан айы келісімен Мұқағали апталығы басталады. Суретшілер суретін салып, ақындар өлеңін жазады. Әкем менің сурет өнеріне икемімді байқаған болуы керек, Мұқағалидың туған күні қарсаңында ақынның кітабын алып келді де, «Балам, осы өлеңдерді оқып, жақсы бір өлеңіне сурет салшы» деді. Содан бастап мен осы иллюстрация жанрын зерттеуді бастадым. Жақсы ән тыңдасаң, ішіңнен ыңылдап айтып жүресің. Жақсы кітап оқысаң, кейіпкердің сөзін қайталап, жазушының қолданған сөзін жаттап алып, солай өмір сүргің келіп, әсерін ұмыта алмай жүресің. Мен де ақын поэзиясынан шабыттанып, «Қайран, жеңгем» әніне сурет салдым. Күйеуі соғысқа кетіп тағдыр азабын тартқан, қартайып қалған, өңі кеткен келіншек пен жанында мұрты едірейіп шай ішіп отырған ер адамның образын жасадым. Аспанда соғыстың жарылыстарын және «Сендер бақытты өмір сүріңдер, мен Отанымды қорғадым» деп алыста қол бұлғап жымиып тұрған солдатты салдым. Осы жұмысым мектепте 1-орынды жеңіп алды. Осылайша, менің Мұқағалиға деген махаббатым 12-13 жасымда, 5-сыныпта оқып жүргенде басталған.
– Ақын жанын терең түсіну үшін оның поэзиясын ғана жақсы көру жеткілікті ме?
– Мұқағалидың өлеңдерін жатқа білемін, ақын туралы қандай ақпарат шығады, бәрін оқимын. Ақынның көп суреттерін салдым, оның біреуі Алматыда музейде тұр. Мұқағалидың балалық шағы соғыспен тұспа-тұс келді. Ауылдағы бас көтерер ер-азаматтың бәрі соғысқа кетті. Еңбекші халық, жалғыз ұлын соғысқа аттандырған ата-әжелер мен жарынан айырылған аналардың қиын тағдырын елестетіп отырып «Күту» деген картинаны жаздым. Бала кезімізде ауылда күн сайын әдемі бір көйлегін киіп, Алматыдан келетін автобус тоқтайтын аялдамада отыратын қарт ана болды. Өзі күнге әбден күйген, көп қиындық көргені жүзі мен қолынан білініп тұратын. Кішкентай балалар ойнап жүріп сол анаға тас лақтырып тиісетін, біз ересектер таратып жіберетінбіз әлгі балаларды. Сол бейне менің есімде қалып қойды. Кейін студент кезде автобустан түскенде баяғы әжені іздедім, бірақ таппадым. Анамнан қарт әженің қайда екенін, неге аялдамада отыратынын сұрадым. Әженің денелі, сымбатты, көрсең көз тоятын жалғыз ұлы болған екен. Алматыға жұмыс істеуге кетіп, содан қайтып ауылға оралмаған. Ұлым қайтып келеді деп үміттенген ана жүрек баласын аялдамада тосумен өмірін өткізген. Мұқағалидың өлеңдерін оқығанда аялдамада ұлын күткен ананың бейнесі көз алдыма келді.
– Бейнелеу өнері пәніне мектепте көп мән берілмейтін сияқты...
– Бұл, сөз жоқ, болашақ балалардың дамуына кедергі. Қазір бейнелеу өнері деген сабақтың аты көркем еңбек. Баланың қиялын өсіретін бейнелеу өнері пәнін технология пәніне қосты. Баланы еркін тәрбиелеудің ең бір әдемі тәсілінен айырылдық десек болады. Батыс елдерінде түстермен жұмыс істеу балабақшадан басталады. Айта берсек, біз талай дүниеге обал жасап жатырмыз. Ауылдағы мектеп директоры бір сиыр алған техникалық қызметшіге «Көркем сурет факультетін сырттай оқып кел, суреттен сабақ бересің» дейді. Сырттай оқыған маманда қандай білім болсын, осылай оқушыларға обал жасап отырмыз. Қалалық жерде балаларға мүмкіндік көп, баласының қабілетін байқаған ата-ана арнайы үйірмеге алып келеді. Ауылда ондай мүмкіндік жоқ, бірақ талант бәрібір жарып шығады.
Үш ауысымда оқитын мектептегі балалар кешкі сағат 8-ге дейін сабақта. Бізде керісінше, орыстар қандай әдістеме ұсынады, сонымен жұмыс істейді. Ешбір ұлтқа, мемлекетке ұқсамайтын өзіміздің әдісті жасап шығуға болады. Кезінде Ахмет Байтұрсынұлы әліппені өзі жасады. Ол әліппенің ит-рәсуәсін шығарды, бүгінде оқулықтың жалпы идеясы Ахметтікі екенін айтуға ұялады.
Тәуелсіздік алғаннан бері қарай тауып алған «ауруларымыз» көп. Білім және ғылым министрі тарихшы болса, тарихты көтереді, математик министр болса, математиканы көтереді. Басқа шетелдің әдісін тәжірибеге енгізгенде, сурет өнерін ұмытып кетеді. Қазақстанда өнер адамдарына әлі дұрыс қолдау көрсетпей, мойындамай келе жатыр. Өмірін қазақ бейнелеу өнеріне арнаған жандар елеусіз қалып жатыр. Жұмыстары музейдің төрінде тұрғанымен, өзі ұмыт қалып, насихатталмай жатқан таланттар бар. Мәдениет және спорт министрінің баяндамасын тыңдасаңыз, ішінен суретшілер туралы бір ауыз сөз таппайсың. Өзі музыкант болғаннан кейін музыка төңірегінде ұйымдастырған концерттер туралы ғана айтылатыны өкінішті.
Сұхбаттасқан
Арайлым ЖОЛДАСБЕКҚЫЗЫ