Астанада тегін баскетбол академиясы ашылды

411 рет оқылды
0

Назарбаев университетінің спорт орталығы базасында балаларға арналған тегін баскетбол академиясы ашылды, деп хабарлайды ҚазАқпарат. Академия 8-14 жас аралығындағы қыздар мен ұлдарды жаттықтыра алады. Бас жаттықтырушы — Деян Парежанин, Сербия азаматы.

«Расымен, академия ашыла қалған осы кезеңге біз Сербиядан маман шақырттық. Бұл кісі балалар баскетболын ғана емес, ерлер арасындағы баскетболдың қыр-сырын жақсы білетін адам. Үйренсін деп өзіміздің екі жаттықтырушыны қостық. Жалпы, негізгі мақсатымыз — шетелден маман шақыру емес, басты мақсатымыз — балалар баскетболын дамыту», — дейді Олимпиада чемпионы, «Астана» баскетбол клубының бас директоры Валерий Тихоненко.

Оның айтуынша, Астананың ауа-райы баскетболды дамыту үшін мүлде кедергі келтірмейді. Алматыдағы баскетболдың дамуы да ауа-райына емес, бұл спортқа қаншалықты көңіл бөлінетініне байланысты және баскетбол тек Алматыда дамысын деген заң жоқ екендігін айтты В.Тихоненко.

Академияға қазірдің өзінде 60 бала жазылған. Ақпан айынан бастап «Астана» баскетбол клубы қаладағы мектептерде шеберлік сабақтарын өткізіп, балаларды қызықтыра түспек.

 

comments powered by HyperComments