كاسىپكەرلەر: بالاباقشا اشۋعا قويىلاتىن سانيتارلىق تالاپتار قىسقارتىلسا

/  94 رەت وقىلدى
0
قازاقستاننىڭ مەكتەپالدى ءبىلىم بەرۋ قاۋىمداستىعى شاعىن جەكەمەنشىك بالاباقشالارعا ارنالعان سانيتارلىق تالاپتار كوپ، سوندىقتان، ولار ءۇشىن ارنايى تالاپ əزىرلەنۋى كەرەك دەيدى. بۇگىن كəسىپكەرلەر مەن مەملەكەتتىك ورگانداردىڭ وكىلدەرى جينالىپ، قازاقستانداعى جەكەمەنشىك بالاباقشالاردىڭ پروبلەمالارىن تالقىلادى، دەپ حابارلايدى قازاقپارات.
جينالىسقا كەلگەن كəسىپكەرلەردىڭ ايتۋىنشا، بۇكىل تالاپقا ساي بولۋ ءۇشىن ۇلكەن بالاباقشا سالۋ كەرەك. ال، ۇلكەن بالاباقشا سالۋ كوپ جاعدايدا ءتيىمسىز دەيدى ولار. مەكتەپالدى ءبىلىم بەرۋ قاۋىمداستىعىنىڭ تالدىقورعان قالالىق فيليالىنىڭ ديرەكتورى مارجان احمەدجانوۆانىڭ ايتۋىنشا، قازاقستاندا سانيتارلىق ەرەجەلەر مەن نورمالاردى ۇشكە ءبولۋ كەرەك. احمەدجانوۆانىڭ ايتۋىنشا، ءبىرىنشى توپقا — تيپتىك نىسانداردى، ەكىنشى توپقا — بالاباقشا اشۋعا بولاتىن، بىراق، باسقا ماقساتتاعى نىساندارعا ارنالعان ۇيىمداردى، ءۇشىنشى توپقا — تۇرعىن ۇيلەردىڭ ءبىرىنشى قاباتىندا ورنالاسقان نىسانداردى جاتقىزۋ كەرەك.
«تالاپ پەن ەرەجەلەردىڭ كوبى ءالى دە بولسا زەردەلەي ءتۇسۋدى قاجەت ەتەدى. مىسالى، قازىر جەكەمەنشىك بالاباقشالارداعى مەديتسينالىق كابينەتتەر مىندەتتى تۇردە ليتسەنزيا الۋى جəنە بالالارعا ارنالعان ەمحانالارمەن كەلىسىمشارت جاساۋى كەرەك. الايدا، ليتسەنزيا الۋعا قاجەتتى قۇجاتتار ءتىزىمى كوپ، ونى تولتىرىپ ءبىتۋ مۇمكىن ەمەس. ەكىنشىدەن، بالالاردىڭ ەمحانالارى كەلىسىمشارت جاساۋعا كەلىسپەي وتىر، ويتكەنى ولارعا دا ليتسەنزيا الۋ كەرەك. ال، تاعى ءبىر ەرەجەگە ساي، ىستەن شىققان لامپالاردى وسى سالاداعى ليتسەنزياسى بار ۇيىمدار عانا الىپ شىعىپ، زالالسىزداندىرا الادى. بىراق، وبلىس ورتالىقتارىندا مۇنداي قىزمەت كورسەتەتىن ۇيىمدار جوق. اۋىلداعى بالاباقشالار قالاي بولادى؟»،-دەيدى احمەدجانوۆا.
ال، قر ۇلتتىق ەكونوميكا مينيسترلىگى تۇتىنۋشىلاردىڭ قۇقىقتارىن قورعاۋ كوميتەتىنە قاراستى سانيتارلى-ەپيدەميولوگيالىق باقىلاۋ باسقارماسىنىڭ باسشىسى مارال راقىمجانوۆانىڭ ايتۋىنشا، كوپ نورمانى الىپ تاستاسا، بالالاردىڭ دەنساۋلىعىنا قاۋىپ تونەدى. «بۇگىندە كوپتىڭ قوياتىن سۇراعى — بالاباقشاعا بارعان بالالار نەگە كوپ اۋىرادى؟ سەبەبى، بالانى ۇيىقتاتىن جەكە بولمە جوق. قازىر قىسقارتىلعان 25 شارشى مەتر اۋماققا جيھاز دا، شكاف تا، ويىنشىق تا، ىدىس-اياق تا قويىلا بەرەدى. بالالار اس ىشەتىن بولمەگە جاتىپ ۇيىقتايدى. سول تاماق ىشكەن ستولدارىنا سۋرەت سالىپ، تۇستەن كەيىن سول بولمەدە بيلەي بەرەدى. ەرەجەلەر مەن نورمالاردى بۇدان ارتىق قىسقارتساق، نە بولادى؟»،-دەيدى ول. دەگەنمەن، ۇلتتىق كəسىپكەرلەر پالاتاسى كəسىپكەرلەردىڭ ۇسىنىستارىن تىڭداپ، 5-10 بالاعا عانا ارنالعان بالاباقشالارعا قاتىستى نورمالاردى قاراۋ كەرەك دەگەن تۇجىرىمعا كەلدى. 

comments powered by HyperComments