جاستار اراسىندا جۇمىسسىزدىق ازايدى ما؟

/  471 رەت وقىلدى
0

2017 جىلدىڭ 1 قاڭتارىنان باستاپ كۇشىنە ەنگەن ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ جاڭا باعدارلاماسىندا جاستاردى تەگىن وقىتۋ جانە ولاردى ەڭبەكپەن قامتۋدىڭ مۇمكىندىكتەرىن قامتاماسىز ەتۋدىڭ نەگىزگى تاسىلدەرى قاراستىرىلعان. بۇل تۋرالى قر ۇكىمەتى وتىرىسىندا قر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ايتتى.

«جاڭارتىلعان باعدارلامادا باستى نازار جاپپاي وقىتۋ ارقىلى ناقتى داعدىلاردى قالىپتاستىرۋعا اۋدارىلعان. وقىتىلعانداردىڭ العان داعدىلارى ولاردىڭ جۇمىسقا ورنالاسۋ نەمەسە جەكە ءىسىن اشۋ مۇمكىندىگىن ارتتىرادى. بۇعان جۇمىسپەن قامتۋ ورتالىقتارى مەن بۇرىنعىداي اۋىلداردا عانا ەمەس، قالالاردا دا شاعىن نەسيەلەندىرۋ قۇرالدارىن قولدانۋ كەڭەيتىلگەن جاپپاي كاسىپكەرلىكتى دامىتۋ شارالارى ىقپال ەتەتىن بولادى»، — دەدى ت.دۇيسەنوۆا.

بۇل مىندەتتەردى جۇزەگە اسىرۋ ءۇشىن ءۇش نەگىزگى باعىت انىقتالعان. بىرىنشىدەن، ورتا ارنايى نەمەسە جوعارى وقۋ ورىندارىنا تۇسپەي قالعان، ءبىلىمى جوق 100 مىڭعا جۋىق جاستارعا ەرەكشە كوڭىل بولىنەتىن بولادى. ولار تەحنيكالىق جانە كاسىپتىك ءبىلىم بازاسىندا العاشقى جۇمىس كاسىبىن تەگىن الۋ مۇمكىندىگىنە يە بولادى.

«ەكىنشىدەن، جاستاردى جۇمىسپەن قامتۋ شارالارىندا كاسىبي باعدار بەرۋ جۇمىستارىن ۇيىمداستىرۋ دا قامتىلادى. 2017 جىلى قر بعم بىرلەسىپ بارلىق جالپى ءبىلىم بەرەتىن مەكتەپتەردە، جوو-لار مەن كوللەدجدەردە كاسىبي باعدار بەرۋ كابينەتتەرى ىسكە قوسىلادى»، — دەدى مينيستر.

ۇشىنشىدەن، ءبىلىم مەكەمەلەرىن تامامداعان جاستاردى جۇمىسقا ورنالاستىرۋدا تۋىندايتىن كەدەرگىلەردىڭ ءبىرى — ەڭبەك ءوتىلىنىڭ بولماۋىنا بايلانىستى «العاشقى جۇمىس ورنى» ماسەلەسى. ونى شەشۋ ءۇشىن «جاستار ءىس-تاجىريبەسى» قۇراۋىشى ساقتالاتىن بولادى. بۇل جاس تۇلەكتەرگە مەملەكەتتىڭ قولداۋى ەسەبىنەن جۇمىس داعدىلارىن يگەرىپ، العاشقى ەڭبەك ءوتىلىن الۋعا مۇمكىندىك بەرەدى، ال بۇل بولاشاقتا تۇراقتى جۇمىس ورنىمەن قامتىلۋىنا جول اشادى.

2016 جىلدىڭ قورىتىندىلارى بويىنشا جاستار اراسىنداعى جۇمىسسىزدىق دەڭگەيى 2001 جىلمەن سالىستىرعاندا ءتورت ەسەدەن اسا تومەندەگەن – 16%-دان 3,9% دەيىن. سونىمەن قاتار، ونىڭ دەڭگەيى ەلىمىز بويىنشا جۇمىسسىزدىقتىڭ جالپى دەڭگەيىنەن ءبىرشاما تومەن. ەل تۇرعىندارىنىڭ جالپى سانىنا شاققاندا  14 جاستان 29 جاسقا دەيىنگى جاستاردىڭ ۇلەسى ولاردىڭ تورتتەن ءبىرىن نەمەسە 4,1 ملن ادامدى قۇرايدى.

comments powered by HyperComments