پرەمەر-مينيستر: شاحانداعى جارىلىسقا «فۋتبولشىلار» كىنالى

/  448 رەت وقىلدى
0

پرەمەر-مينيستر باقىتجان ساعىنتاەۆتىڭ جاۋاپكەرشىلىكتى ءبىر-بىرىنە ىسىرىپ قوياتىن مەملەكەتتىك ورگاندار جۇمىسىن سىنعا الدى. ۇكىمەت باسشىسى شاحانداعى توتەنشە جاعداي ورتالىق پەن جەرگىلىكتى بيلىكتىڭ اراسىندا بىرلىكتىڭ جوقتىعىنان بولدى دەپ ەسەپتەيدى.

«ماعان ءبىر نارسە ۇناماي تۇر، (ەنەرگەتيكالىق قاۋىپسىزدىك بويىنشا — اۆت.) وكىلەتتىلىكتەردى ءوزارا ءبولىسىپ، اكىمدىكتەرگە بەردىك، الدىق دەپ وتىرسىزدار. الايدا ەشقانداي جاۋاپكەرشىلىك جوق. ەندى، ونى (مەملەكەتتىك ورگاندارعا — اۆت.) تاعى قايتارۋ كەرەك پە، جوق الدە، قاداعالاۋ شارالارىن كۇشەيتەمىز دەيسىزدەر. ول دۇرىس ەمەس قوي. وكىلەتتىلىك بەرىلگەننەن كەيىن جەرگىلىكتى اتقارۋشى ورگاندار ءوز مىندەتتەرىن بۇلجىتپاي ورىنداۋى ءتيىس. بىزدە ەنەرگەتيكا مينيسترلىگىندە ەنەرگەتيكالىق قاداعالاۋ قىزمەتى بار. ول قايدا قاراپ وتىر؟ ءسويتىپ، جەرگىلىكتى بيلىككە وكىلەتتىلىكتى بەردىك دەيمىز، ولار بولسا، ورتالىقتاندىرىلعان جىلۋ جۇيەسىن قوسايىن دەسەك، ورتالىق اقشا بەرمەي وتىر دەپ شىعادى. ورتالىق ورگاندار بولسا، اقشا بەرەيىن دەسەك، جەرگىلىكتى بيلىك قۇجاتتاردى جىبەرمەي جاتىر دەيدى. وسىلايشا، «فۋتبول ويناپ» وتىرادى. اقىر سوڭىندا شاxان سياقتى ەلدىڭ مەكەندەردىڭ جىلىتۋعا قاتىستى بارلىق پروبلەمالاردى xالىقتىڭ موينىنا ارتىپ قويدىق. وسىدان كەيىن ادامدار امال جوق، پەش قويادى، «بۋرجۋيكا» ورناتادى، نەشە ءتۇرلى قازاندىقتاردى كىرگىزەدى. ءۇيدى ءوز كۇشىمەن جىلىتادى. سوسىن كەشەگىدەي قايعىلى وقيعالارعا تاپ بولامىز»، — دەدى ب.ساعىنتاەۆ. ونىڭ ويىنشا، ەگەر ءۇيدى جىلىتۋ قوندىرعىلارى قاۋىپتى بولسا، وندا ناقتى ءبىر تالاپتاردى ازىرلەۋ كەرەك. وسىعان بايلانىستى ناقتى ءبىر قۇجاتتىڭ بولعانى ءجون. «بىلايشا ايتقاندا، ناقتى ءبىر جۇمىستى قولعا العان ءجون. ءبىز بولساق، ءاي، جىلۋ بولسا بولدى دەپ، سالعىرت قاراپ وتىرمىز»، — دەدى پرەمەر-مينيستر.

ۇكىمەت باسشىسى ب.ساعىنتاەۆ ءوز ورىنباسارى اسقار مامينگە جەرگىلىكتى اكىمدىكتەر مەن مەملەكەتتىك ورگانداردىڭ ءوزارا جاۋاپكەرشىلىگىن ناقتى بەلگىلەپ الۋدى مىندەتتەدى.

 

comments powered by HyperComments