Uaqıtşa tirkeuge twrmağandardı jazalau qaşan bastaladı?

/  350 ret oqıldı
0

Uaqıtşa tirkeuge twrmağan azamattarğa äzirge ayıppwl salınbaydı. QR İşki ister ministri Qalmwxambet Qasımovtıñ aytuınşa, bir ay boyı tärtip saqşıları uaqıtşa tirkeuge twrmağandarğa tek eskertu jasaumen şektelmek.

«Jaña normanıñ negizgi maqsatı – işki köşi-qondı baqılap otıru. Osınıñ negizinde densaulıq saqtau, bilim beru, jwmıs orındarın aşu jäne tağı basqa äleumettik-ekonomikalıq mäseleler şeşiledi. Bwl – jalpıälemdik täjiribe. Mäselen, Germaniyada twraqtı meken-jayınan köşip ketkeni, ya bolmasa, böten bireudiñ meken-jayın paydalanğanı üşin 1 000 — 50 000 euro aynalasında ayıppwl töleu mindeti bar», — dep atap körsetti Q.Qasımov.

Eske sala keteyik, Qazaqstan azamattarın uaqıtşa tirkeluge mindetteytin zañ qañtardıñ 7-sinen bastap küşine engen bolatın. Endi öz üyine adamdardı twrğızğanı üşin baspana iesine jauapkerşilik engizilip otır. Olardı uaqıtşa tirkeuge qoyu qajet. Atalğan norma bir ret bwzılsa, 10 AEK köleminde ayıppwl salınadı. Al bir jıldıñ işinde tağı qaytalansa, ayıppwldıñ kölemi eki esege artpaq.

Ayıppwl arqalağısı kelmese, el twrğındarı ay soñına deyin twrğılıqtı jeri boyınşa uaqıtşa tirkeuge twruı tiis. Bwl procesti jeñildetu üşin Ükimet azamattarğa onlayn rejimde tirkelu mümkindigin wsınıp otır.

Qazirgi kezde onlayn rejimde tek twraqtı tirkeu qızmeti ğana jwmıs isteydi. QR Aqparat jäne kommunikaciyalar ministri Däuren Abaevtıñ mälimdeuinşe, bir aydıñ işinde oğan uaqıtşa tirkelu qızmeti de qosıladı. «Qazirgi kezde işki logistika mäseleleri rettelip jatır. Negizgi maqsat — xalıqqa qızmet körsetu ortalıqtarındağı kezekterdi azaytu. Ol üşin derekter bazaların özara kiriktiru kerek. Sodan keyin uaqıtşa tirkeudi onlayn rejimde iske qosuğa boladı. Oğan wlttıq aqparattıq texnologiyalar ortalığı men işki ister ministrligi jauaptı. Bir aydan az uaqıtta atalğan qızmet engiziledi», — dedi D.Abaev.

«Azamattarğa arnalğan ükimettiñ» basqarma törağası Daniyar Erençinovtıñ aytuınşa, büginde xalıqqa qızmet körsetu ortalıqtarında jwmıs kestesi tañğı sağat 8:00-den keşki 20:00-ge deyin wzartılğan jäne uaqıtşa tirkeu boyınşa jwmıs isteytin mamandardıñ sanı köbeygen.

comments powered by HyperComments