16 اقپان 2020, 09:03 415 0 جاھان انار لەپەسوۆا

قاسىم-جومارت توقاەۆ: قازاقستان – ورتالىق ازيادا ماڭىزعا يە مەملەكەتتەردىڭ ءبىرى

قازاقستان پرەزيدەنتى قاسىم-جومارت توقاەۆ ميۋنحەن قاۋىپسىزدىك كونفەرەنتسياسى اياسىندا «گەوگرافيالىق ورنالاسۋدىڭ ماڭىزى: ورتالىق ازياداعى قازىرگى جاعداي» تاقىرىبىنداعى پىكىرتالاسقا قاتىستى. 

قازاقپاراتتىڭ حابارلاۋىنشا، حالىقارالىق قاتىناستار كەڭەسىنىڭ پرەزيدەنتى ريچارد حااس جەتەكشىلىك ەتكەن پىكىرتالاسقا مەملەكەت باسشىسى قاسىم-جومارت توقاەۆ پەن اۋعانستان يسلام رەسپۋبليكاسىنىڭ پرەزيدەنتى مۇحاممەد اشراف عاني قاتىستى.

پىكىرتالاستا ق.توقاەۆ گەوگرافيالىق ورنالاسۋدىڭ ماڭىزى تۋرالى ءسوز قوزعادى.

«قازاقستان جەر كولەمى بويىنشا 9-ورىنداعى مەملەكەت. بۇل، البەتتە، بىزگە كوپتەگەن مۇمكىندىك پەن جول اشادى. رەسەي، قىتايمەن كورشىلەس بولۋدىڭ دا ارتىقشىلىقتارى بار. ورتاق شەكارا تىعىز قارىم-قاتىناس ورناتۋعا مۇمكىندىك بەرەدى. قازاقستان – ورتالىق ازيادا ماڭىزعا يە مەملەكەتتەردىڭ ءبىرى. ورتالىق ازيا دا كۇننەن كۇنگە دامىپ جاتىر. مەنىڭ ويىمشا، بۇل ىلگەرىلەۋ ءالى جالعاسىن تابادى»، - دەدى مەملەكەت باسشىسى.

ريچارد حااستىڭ ەنەرگيا كوزدەرى تۋرالى ساۋالىنا قر پرەزيدەنتى: «مەملەكەتىمىز ءتۇرلى ەنەرگيا كوزدەرىنە يە. بۇل دا ءبىر ارتىقشىلىق. ەكونوميكانىڭ دامۋى ءۇشىن جاڭا جوبالار مەن باعدارلامالاردىڭ قاجەت ەكەنىن تۇسىنەمىز»، - دەدى ق.توقاەۆ.

 

سوڭعى جاڭالىقتار