13 اقپان, 15:39 1170 0 جاھان انار لەپەسوۆا

وزبەكستان بيلىگى قازاقستاندا وقيتىن ستۋدەنتتەرىن جاپپاي قايتارىپ جاتىر

وزبەكستان بيلىگى قازاقستان جانە تاجىكستاندا وقيتىن ستۋدەنتتەرىن قايتارىپ جاتىر. مەملەكەت ورتالىق ازيانىڭ وزگە ەلدەرىندە ءبىلىم الىپ جۇرگەن ازاماتتارىن دا قايتارماق. بۇل تۋرالى ورتالىق ازيانىڭ جاڭالىقتار قىزمەتى حابارلادى. 

شىمكەنتتە وقىپ جاتقان 15 مىڭعا جۋىق وزبەك ستۋدەنتى جاپپاي قۇجاتتارىن قايتارىپ الىپ جاتىر. دەرەككوزدىڭ حابارلاۋىنشا، ولار كەزەكتىڭ تىم كوپتىگىنەن ۇلگەرمەي جاتقانىن ايتقان. وزبەك بيلىگى شەتەلدە وقىپ جاتقان ستۋدەنتتەردى وزبەكستانداعى جوعارى وقۋ ورىندارىنا ەش ەمتيحانسىز اۋىستىراتىنىن مالىمدەگەن.

قازاقستاننىڭ جوعارى وقۋ ورىندارىنان قۇجاتتارىن كەرى قايتارىپ الىپ جاتقانداردىڭ دەنى — سىرتتاي نەمەسە قاشىقتىقتا ونلاين وقيتىندار. ولاردىڭ اراسىندا جاسى ەرەسەك ازاماتتارى دا بار.

"مەن شىمكەنتتە وقيمىن. جاسىم 52-دە. وزبەكستان ازاماتىمىن. ەلدە جوعارى ءبىلىمسىز جۇمىس ىستەۋ مۇمكىن ەمەس. سول ءۇشىن وسىندا وقۋعا كەلگەم. ەندى پرەزيدەنت ميرزياەۆ ەلگە شاقىرىپ جاتىر. قازىر قۇجاتتارىن الىپ جاتقان ادامدار وتە كوپ. ءبارى ۇلگەرمەي جاتىر",- دەيدى مۋحتابار ومونوۆا ەسىمدى ايەل.

جوعارى وقۋ ورنى وقىتۋشىلارى قولدان كەلگەنىنشە كومەكتەسىپ جاتقانىن، بىراق كەزەكتىڭ تىم كوپتىگىنەن ۇلگەرمەي جاتقانىن ايتادى. قۇجاتتارىن كايتارىپ العىسى كەلەتىن ستۋدەنتتەرگە قويىلاتىن باستى تالاپ — قارىزى بولماۋى كەرەك.

"بىزدە 7 مىڭنان استام ستۋدەنت بار. ءبىز مۇنداي اجيوتاج بولادى دەپ ويلامادىق. ءبىز قازىر ولاردىڭ قولىنا تەك ترانسكريپت بەرىپ جاتىرمىز، قۇجاتتاردىڭ ءوزى مۇراعاتتا ساقتالادى. ەگەر ولاردى وزبەكستان قابىلداماسا، قايتىپ كەلىپ وقۋىنا بولادى",- دەيدى شىمكەنتتەگى م. اۋەزوۆ اتىنداعى مەملەكەتتىك ۋنيۆەرسيتەت پرورەكتورى سادىبەك بەيسەنباەۆ.

تاجىكستاندا وقىپ جاتقان وزبەك ستۋدەنتتەرىنە ونداعى وقۋ ورىندارى وزبەكستاننىڭ ۇلتتىق رەيتينگى تىزىمىندە جوق ەكەنىن ايتقان. دەمەك ونداعى ءبىلىم ساپاسى دا كۇمان كەلتىرەدى دەگەن. ال قازاقستانداعى جاعدايعا بايلانىستى سەبەبى تۇسىندىرىلمەدى.

تەگتەر وزبەكستان

سوڭعى جاڭالىقتار