23 قاڭتار 2020, 17:19 3368 0 زاڭ انار لەپەسوۆا

جاڭا زاڭ: "بايقوڭىردى" جالعا بەرۋ شارتى وزگەردى

سەناتتىڭ جالپى وتىرىسىندا «2004 جىلعى 22 جەلتوقسانداعى قر ۇكىمەتى مەن رف ۇكىمەتى اراسىنداعى «بايقوڭىر» عارىش ايلاعىندا «بايتەرەك» عارىش زىمىران كەشەنىن قۇرۋ تۋرالى كەلىسىمگە وزگەرىستەر مەن تولىقتىرۋلار ەنگىزۋ جونىندەگى حاتتامانى راتيفيكاتسيالاۋ تۋرالى» زاڭى قابىلداندى. 

باستاپقىدا جوبانى «انگارا» رەسەيلىك زىمىراننىڭ نەگىزىندە ىسكە اسىرۋ جوسپارلانعان ەدى. الايدا «انگارا» ۋاقىتىندا دايىن بولماعان. ماسەلەنى قوسىمشا پىسىقتاۋدىڭ ناتيجەسىندە تاراپتار جوبانى «سويۋز-5» زىمىرانى نەگىزىندە ىسكە اسىرۋدى شەشكەن. وسىلايشا رەسەي فەدەراتسياسى زىمىراندى جاساۋ ىسىنە جاۋاپ بەرسە، قازاقستان جەرۇستى ينفراقۇرىلىمىن قامتاماسىز ەتەدى.

«وسى جوبادا رەسەي تاراپى «سويۋز-5» زىمىراندى، تەحنيكالىق جانە ستارتتىق كەشەندەرىندە باقىلاۋ-تەكسەرۋ جابدىقتارىن قۇرۋدى، سونداي-اق ۇدەمەلى بلوكتىڭ تەحنيكالىق كەشەنىن، عارىش اپپاراتىن جانە عارىشتىق باستيەك بولىگىن جاڭعىرتۋدى قامتاماسىز ەتەدى. وسى جۇمىستار 916 ملن اقش دوللارى سوماسىندا باعالاندى»، – دەدى قر تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆ.

ستارتتىق جانە تەحنيكالىق كەشەندەردى جاڭعىرتۋ، جۇمىس ىستەپ تۇرعاندارىن كۇردەلى جوندەۋ جانە قايتا جاڭارتۋ، سونداي-اق جەرۇستى عارىش ينفراقۇرىلىمىنىڭ جاڭا وبەكتىلەرىن سالۋ جۇمىستارى ءۇشىن 233 ملن اقش دوللارى بولىنەدى. وعان قازاقستاندىق كومپانيالاردى بارىنشا تارتۋ جوسپارلانىپ وتىر، دەدى ۆەدومستۆو باسشىسى اسقار جۇماعاليەۆ. اتالعان زاڭ جوباسىن سەنات دەپۋتاتتارى ءبىراۋىزدان ماقۇلدادى.

 

سوڭعى جاڭالىقتار