22 قاڭتار, 20:09 508 0 الەۋمەت انار لەپەسوۆا

"كومپانيا شوتىندا قارجى جوق": Bek Air جولاۋشىلارعا بيلەتتەردىڭ اقشاسىن ءالى قايتارماعان

Bek Air اۋە كومپانياسى جولاۋشىلارعا ورىندالماعان رەيستەردىڭ اقشاسىن ءالى كۇنگە دەيىن قايتارماعان. جولاۋشىلار كاسىپورىننىڭ قولداۋ قىزمەتى مەن بيلەتتەردى ساتىپ العان ونلاين رەسۋرستارعا، كولل-ورتالىقتارعا حابارلاسسا دا، ەش ناتيجە شىقپاي وتىر. امالى قالماعاندىقتان، كەيبىرى وزگە اۆيا تاسىمالداۋشىلاردىڭ رەيستەرىن نەمەسە پويىزداردىڭ قىزمەتىن پايدالانۋعا ءماجبۇر بولعان، دەپ حابارلايدى "الماتى" ارناسى. 

نۇر-سۇلتان قالاسىنىڭ تۇرعىنى ايدانا سماعۇلوۆا ءوزىنىڭ اقشاسىن ءۇش اپتا بويى قايتارا الماي ءجۇر. ايتۋىنشا، بيلەت ساتىپ العان اگەنتتىك پەن Bek Air اۋە كومپانياسى ءبىر-بىرىنە سىلتەۋدە ەكەن. بۇعان قوسا، كولل-ورتالىقتاردىڭ تەلەفوندارى جاۋاپ بەرمەيدى. ال الەۋمەتتىك جەلىلەردەگى جاعىمسىز پىكىرلەردى اۋە تاسىمالداۋشىسى ادەيىلەپ وشىرەتىن كورىنەدى.

«الەۋمەتتىك جەلىدە، تەلەارنالداردا Bek Air بيلەتتىڭ قۇنىن قايتارۋدا دەپ جاتىر عوي. مەن ايتار ەدىم، ول ەشقانداي شىندىققا ساي كەلمەيدى. سەبەبى سول 27-جەلتوقساننان 24 كۇن بولدى مەن ءوزىمنىڭ بيلەتىمنىڭ قۇنىن قايتارا الماي ءجۇرمىن. بيلەتتى اۋە اگەنتتىگى ارقىلى العانمىن. Bek Air-گە حابارلاسىپ ەدىم، ولار «اۋە اگەنتىككە حابارالسىڭىز، سولار قايتارىپ بەرەدىا دەدى. ال، ولار بىزگە ءبىر تيىن دا قايتارعان جوق. «كومپانيا اقشا بەرمەسە، سىزگە قالاي قايتارامىز؟ ءبىز ءوزىمىزدىڭ قىزمەتىمىز ءۇشىن تولەپ قويعانبىز» دەيدى»، - دەدى ايدانا سماعۇلوۆا.

ءداپ وسىنداي ماسەلەگە لەيلا بەكەسوۆا دا تاپ بولعان. 10-شى اقپان كۇنى الماتىدان اتىراۋعا ۇشۋى ءتيىس ول ەندى نە ىستەرىن بىلمەي دال.

«بيلەتتى 26 جەلتوقسان كۇنى ساتىپ الدىم. 28 جەلتوقساننان بەرى قۇنىن قايتارۋدى سۇراپ كەلەمىن. كۇتۋ كەرەك دەگەن باستاپقىدا. الايدا قازىر مۇلدەم جاۋاپ جوق. ۇشۋ كۇنى تاياپ قالدى. وزدەرىڭىز بىلەسىزدەر، ەكى-ءۇش اي بۇرىن ادەيى ساتىپ الامىز. ونىڭ وزىندە ەڭ ارزانى 60 مىڭ تەڭگە. سەبەبى كۇنبە-كۇن الساڭ، باعاسى ۋداي. اسىرەسە، الماتى-اتىراۋ باعىتى قىمبات. قازىر نە ىستەرىمدى بىلمەيمىن. ەكى اپتاداي عانا قالىپ وتىر»، - دەيدى لەيلا بەكەسوۆا.

ال ازاماتتىق اۆياتسيا كوميتەتى بۇعان قاتىستى قانداي دا ءبىر اقپار بەرە المادى. تەك جۇما كۇنى وسى ورايدا بريفينگ بولاتىنىن مالىمدەپ وتىر.

Bek Air اۋە كومپانياسىنان بيلەت ساتىپ الىپ، قۇنىن قايتارا الماعاندار تەلەگرامدا ارنايى چات اشقان. مۇندا 50-دەن استام ادام بار. ولاردىڭ ءبىرى اۋە كومپانياسىنىڭ كولل ورتالىعى جاۋاپ بەرگەن حابارلاماسىن سالعان. وندا كاسىپورىن بيلەت قۇنىن قايتارا المايتىنىن، اۋە كومپانياسىنىڭ شوتىندا اقشا جوق دەپ جازعان. ال قاراجات رەيستەر جاڭارتىلعاندا عانا بولادى دەلىنگەن.

ال Bek Air اۋە كومپانياسىنا بولەك قىلمىستىق ءىس قوزعالماعان. تەك ۇشاق اپاتىنا بايلانىستى تەرگەلىپ جاتقانى ءمالىم بولدى. بۇل تۋرالى بۇگىن ءماجىلىس وتىرىسىنان كەيىن كۋلۋاردا باس پروكۋروردىڭ ورىنباسارى ايتتى.

«تەرگەۋ امالدارى ءجۇرىپ جاتىر، 14 ساراپتاما تاعايىندالدى. سولاردىڭ بارلىعىنىڭ قورىتىندىسىن العان سوڭ، 300-دەي ادامنان جاۋاپ الىندى. ناقتى قالاي بولعان، كىم كىنالى، قانداي كەمشىلىكتەر بار، سول جەردە وسىنداي ناقتى ءبىر شەشىم قابىلدانادى»، - دەدى قر باس پروكۋرورىنىڭ ورىنباسارى مارات احمەتجانوۆ.

ايتا كەتەيىك، بىلتىر 27 جەلتوقساندا الماتىدان نۇر-سۇلتان قالاسىنا ۇشپاق بولعان Bek Air اۋە كومپانياسىنا تيەسىلى فوككەر 100 ۇشاعى اپاتقا ۇشىراعان ەدى. بورتا 93 جولاۋشى مەن 5 ەكيپاج مۇشەسى بولعان. اپاتتان 12 ادام مەرت بولدى. ونىڭ بىرەۋى – ۇشاق كومانديرى. الدىن الا بولجام بويىنشا ۇشاقتىڭ قۇلاۋىنا  اۋە كەمەسىنىڭ ۇستىنە مۇزدىڭ قاتىپ قالۋى سەبەپ بولۋى ىقتيمال.

سوڭعى جاڭالىقتار