16 قاڭتار, 16:00 621 0 جاھان انار لەپەسوۆا

"قىلمىس بولۋى مۇمكىن": يسپانيادا قازاقستاندىق كاسىپكەر كوز جۇمدى

يسپانياداعى ساياجايلاردىڭ بىرىندە قازاقستاندىق ازاماتتىڭ دەنەسى تابىلدى. بۇل جايلى قر ءسىم حابارلادى. 

يسپانيالىق Eldia.es باسىلىمىنىڭ حابارلاۋىنشا، 53 جاستاعى كاسىپكەر اليكانتەدەگى ۆيللالاردىڭ بىرىندە كوز جۇمعان.

«ەر ادامنىڭ دەنەسىن سەيسەنبى كۇنى كەشكە باعبان تاۋىپ، حابار بەرگەن. ول جەدەل جاردەمدى، سونداي-اق ازاماتتىق كۇزەت پەن جەرگىلىكتى پوليتسيانىڭ بىرنەشە ءپاترۋلىن شاقىرعان. ەر ادامنىڭ قايتىس بولعانىن بىلگەن ماماندار ءىستىڭ ءمان-جايىن ەسكەرە وتىرىپ، تەرگەۋشىلەردىڭ كەلۋىن تالاپ ەتكەن. مارات سابالاقوۆتىڭ دەنەسى باسپالداقتىڭ استىندا ەتپەتىنەن جاتقان. سوندىقتان ءبىر نۇسقا بويىنشا، ول قۇلاپ قايتىس بولۋى مۇمكىن. الايدا قاراقۇس تۇسىنداعى سوققىدان كەلۋى مۇمكىن جاراقات، سونداي-اق قان بەلگىسىنىڭ ءۇي ىشىندە دە بولۋى – قىلمىس بولۋى مۇمكىن ەكەنىن جوققا شىعارمايدى»، - دەپ حابارلايدى باسىلىم.

ال تاعى ءبىر يسپاندىق diarioinformacion.com سايتى مارات سابالاقوۆتىڭ قازاسى قىلمىستان ەمەس، وقىس جاعدايدان بولعانىن جازادى.

قر سىرتقى ىستەر مينيسترلىگى يسپانيادا قازاقستان ازاماتىنىڭ قايتىس بولعانىن راستاپ وتىر. «يسپانيا پوليتسياسى قازاقستان ازاماتىنىڭ كوز جۇمعانىن حابارلادى. سونداعى كونسۋل ءىستىڭ ءمان-جايىن انىقتاۋ ءۇشىن وقيعا ورنىنا اتتاندى»، - دەپ حابارلايدى قر ءسىم رەسمي وكىلى ايبەك سمادياروۆ.

 

سوڭعى جاڭالىقتار