13 جەلتوقسان, 10:20 450 0 جاڭالىقتار اسىل تۇمار

«ەكىباستۇز-2» ەلەكتر ستانساسىن ساتىپ الدىق

سۋرەت دەرەككوزدەن الىندى
سۋرەت دەرەككوزدەن الىندى

«سامۇرىق-قازىنا» ۇلتتىق ءال-اۋقات قورى رەسەيلىك «ينتەر راو» ەنەرگەتيكالىق كومپانياسىنان «ەكىباستۇز-2» ەلەكتر ستانساسىنىڭ 50 پايىز اكتسياسىن سا­تىپ الدى.

وسىلايشا، ماڭىزدى ەلەكترەنەرگيا اكتيۆى تولىعىمەن قازاقستان رەسپۋبليكاسىنىڭ باقىلاۋىنا ءوتتى. بۇل تۋرالى بريفينگ بارىسىندا «سامۇرىق-ەنەرگو» كومپانياسىنىڭ باسقارۋشى ديرەكتورى الماسادام ساتقاليەۆ ءمالىم­دە­دى.

– رەسەي تاراپى مەنشىگىندەگى اكتسياسىن 50 ملن دوللارعا باعالاپ، ساۋداعا سالدى. ءبىز كەلىسسوز ناتيجەسىندە ءبىر مامىلەگە كەلىپ، رەسەيلىكتەر ۇلەسىن 25 ملن دوللارعا ساتىپ الدىق. بارلىق قۇجاتقا قول قويىلدى. بۇل اكتيۆتەردىڭ ارقاسىندا «ەكىباستۇز-2» ستانساسىندا ءۇشىنشى ەنەرگوبلوگتىڭ قۇرىلىسىن اياقتاۋعا مۇمكىندىك تۋدى. ەلباسىنىڭ ءوزى تىكەلەي تاپسىرعان جوبانى جۇزەگە اسىرۋعا ەنەرگەتيكا مينيسترلىگى دە اتسالىسادى، – دەدى الماسادام ساتقاليەۆ.

جالپى، «سامۇرىق-ەنەرگو» مەن «ينتەر راو» كومپانيالارىنا قاراستى قازاقستان – رەسەي بىرلەسكەن كاسىپورنى 2005 جىلى قۇرىلعان. ەندى قازاقستان ۇكىمەتى ستانسانى كەڭەيتۋگە كىرىسىپ، قايتا قۇرۋ شەڭبەرىندە قۋاتتىلىعى 636 مۆت-تى قۇرايتىن ءۇشىن­شى ەنەرگوبلوكتى ورناتادى. بۇل جوبا قازاق­ستاننىڭ ەلەكتر ەنەرگياسىنا دەگەن كۇننەن-كۇنگە ءوسىپ كەلە جاتقان قاجەتتىلىكتى قامتاماسىز ەتۋگە جانە ەكسپورتتىق الەۋەتىن ارتتىرۋعا سەپتىگىن تيگىزەدى.

2009 جىلى قازاقستان رەسپۋبليكاسى مەن رەسەي فەدەراتسياسىنىڭ ۇكىمەتتەرى اراسىنداعى كەلىسىم اياسىندا «ەكىباستۇز ماسەس-2 №3 ەنەرگوبلوگىنىڭ قۇرىلىسى» جوباسى ىسكە قوسىلعان ەدى. 2010 جىلى ءتيىستى سمەتالىق قۇجاتتار ازىرلەنىپ، مەملەكەتتىك ساراپتامادان ءوتتى. وسىنىڭ نەگىزىندە «ەكى­­باستۇز مەملەكەتتىك اۋداندىق ەلەكتر ستان­ساسى» كومپانياسىنىڭ 50 پايىز ۇلەسىن ساتىپ الۋعا شەشىم قابىلداندى.

ستانسانى تولىق باقىلاۋ ەلىمىزدىڭ ەنەر­گەتيكالىق تاۋەلسىزدىگىن كۇشەيتۋگە اسەر ەتەدى. قازىرگى تاڭدا قازاقستان قوسىم­شا ەلەكتر قۋاتىنا مۇقتاج. ۇلتتىق ەكونوميكانىڭ دامۋىنا ەنەرگەتيكا سالاسىنىڭ ىقپالى زور.

ايتا كەتەيىك، «ەكىباستۇز-2» ستانساسى­نىڭ مۇرجاسى – الەمدەگى ەڭ ۇزىن ءتۇتىن شى­عاراتىن قۇبىر. ونىڭ بيىكتىگى – 419,7 مەتر. ال كەشەننىڭ ءبىر ءوزى بايقوڭىر سياقتى ءىرى عارىش ايلاعى مەن وزگە دە ستراتەگيالىق ما­ڭىزدى نىسانداردى قامتاماسىز ەتۋگە قاۋقارلى. مامانداردىڭ بولجامىنا سەن­سەك، ەكىباستۇزداعى كومىردىڭ جالپى گەو­لوگيالىق قورى – شامامەن 10 ملرد توننا.

aikyn.kz

سوڭعى جاڭالىقتار