12 جەلتوقسان, 13:39 442 0 ادەبيەت Túrkistan Gazeti

الاش قايراتكەرى بارلىبەك سىرتتانۇلىنىڭ كىتابى جارىق كوردى

جاقىندا «الاشوردا» قوعامدىق قورى باسپاسىنان مادەنيەت جانە سپورت مينيسترلىگىنىڭ باعدارلاماسى اياسىندا تۇڭعىش رەت الاش قايراتكەرى، كورنەكتى ساياسي تۇلعا، قازاقتىڭ العاشقى كونستيتۋتسياسىن جازعان زاڭگەر بارلىبەك سىرتتانۇلىنىڭ كىتابى 5 مىڭ دانا تارالىممەن شىعىپ وتىر.

بارلىبەك سىرتتانۇلى 1866-1914 جىلدار ارالىعىندا ءومىر سۇرگەن قازاق وقىعانى. 1890 جىلى سانكت-پەتەربورداعى يمپەراتورلىق ۋنيۆەرسيتەتتى ۇزدىك بىتىرگەن، 9 ءتىلدى ەمىن-ەركىن مەڭگەرگەن ءبىلىمدى، ەرۋديت ازامات. الاش قوزعالىسىنىڭ ورتالىق تۇلعاسى رەتىندە ازاتتىق يدەياسىن تاراتقان، پاتشالىق ۇكىمەتكە قارسى كۇرەس ۇيىمداستىرعان رەفورماتور. 1911 جىلدىڭ 13 ماۋسىمىندا ءا.بوكەيحاننىڭ تاپسىرماسىمەن 4 ءبولىم، 28 باپتان  عانا تۇراتىن «قازاق ەلىنىڭ ۋستاۆى» كونستيتۋتسيالىق ەڭبەگىن جازعان. الماتى قالاسىنان ءى مۇسىلماندار كىتاپحاناسىن، ەمحاناسىن، مەكتەبىن اشقان حالىق پەرزەنتى. 1914 جىلدىڭ 26 قاراشاسىندا جەتىسۋ وبلىسىنىڭ اسكەري گۋبەرناتورى م.فولباۋمنىڭ بۇيرىعىمەن اتۋ جازاسىنا كەسىلگەن. 48 جاسىندا قازا تاپقان قايراتكەر «ىنتىماق ەرەجەسى»، «دارىلىك وسىمدىكتەر»، «قازاقتاردىڭ ءومىرىن جاقسارتۋ تۋرالى» ت.ب. ەڭبەكتەردىڭ اۆتورى.

كىتاپتى قۇراستىرىپ، العىسوزى مەن تۇسىنىگىن جازعان تۇلعا مۇراسىن زەرتتەۋشى، «دارىن» مەملەكەتتىك جاستار سىيلىعىنىڭ لاۋرەاتى ەلدوس توقتارباي. كىتاپتىڭ ءبىرىنشى بولىمىنە بارلىبەك سىرتتانۇلىنىڭ ءومىر جولىنا، قوعامدىق-ساياسي قىزمەتىنە قاتىستى ماسكەۋ، پەتەربور، تاشكەنت، ومبى ارحيۆتەرىنەن تابىلعان تاريحي قۇجاتتار مەن ماتەريالدار توپتاستىرىلعان. كىتاپتىڭ «بارلىبەكتانۋ ماسەلەلەرى» دەگەن ەكىنشى بولىمىنە ءار جىلدارى جازىلعان تۇلعا تۋرالى عالىمداردىڭ ماقالالارى مەن زەرتتەۋلەرى ەنگەن. كىتاپتىڭ جالپى رەداكتسياسىن ۇعا اكادەميگى، ف.ع.د.، پروفەسسور د.قامزابەكۇلى باسقارعان. كىتاپقا ز.ع.د.، پروفەسسور ن.دۋلاتبەكوۆ، ت.ع.د.، پروفەسسور و.مۇحاتوۆا، ف.ع.د.، پروفەسسور س.جۇماعۇل سىندى عالىمدار پىكىر جازعان. بۇل كىتاپ بارلىبەك سىرتتانۇلىن تانيمىن، زەرتتەيمىن دەگەن نيەتى بار جاستارعا وي سالىپ، مول دەرەك بەرەدى.

 

 

 

سوڭعى جاڭالىقتار