10 جەلتوقسان, 09:17 410 0 جاڭالىقتار اسىل تۇمار

زەينەتاقى اقشاسىنا ءۇي الاسىڭ دەپ حالىقتى الدامايىق – ءماجىلىس دەپۋتاتى

Zakon.kz-ءتىڭ حابارلاۋىنشا، ءماجىلىس دەپۋتاتى امانجان جامالوۆ قازاقستاندىقتارعا زەينەتاقى جيناقتارىنىڭ ءبىر بولىگىن باسپانا ساتىپ الۋعا پايدالانۋعا مۇمكىندىك بەرۋ تۋرالى باستامانىڭ زاڭ جۇزىندە شيكى ەكەنىن اشكەرەلەدى. ول زاڭدى ءالى دە جەتىلدىرۋ كەرەك دەپ سانايدى.

– ءالى كۇنگە دەيىن ەڭبەك جانە حالىقتى الەۋمەتتىك قورعاۋ مينيسترلىگىنىڭ بۇعان قاتىستى بەرگەن ناقتى تۇسىنىگى جوق پا؟ ازاماتتار زەينەتاقى جيناقتارىنىڭ ءبىر بولىگىن قالاي تۇرعىن ءۇي مەن ءبىلىم الۋ ءۇشىن پايدالانادى؟ مىسالى، قازىرگى ۋاقىتتا تالقىلانىپ جاتقان زاڭ جوباسى نۇسقاسىندا ول جاعدايى بار ادامدار ءۇشىن عانا مۇمكىن، ياعني ەر ادامداردىڭ زەينەت جيناعى ول ءۇشىن 8,2 ميلليون، ايەلدەر ءۇشىن - 10,1 ميلليون تەڭگە بولۋى كەرەك. ياعني، جيناقتاعان زەينەتاقى قاراجاتى وسى شەكتەن اسقاندا عانا ونىڭ ءبىر بولىگىن ءوز قاجەتتىلىگىنە پايدالانۋعا بولادى، – دەيدى دەپۋتات.

بۇگىنگى تاڭدا، ونىڭ ايتۋىنشا، بۇل شەكتەن زەينەتاقى جيناعى اسقان 90 مىڭ ادام، ياعني ​​بجزق سالىمشىلارىنىڭ 1% -تىنەن دە از.

– ايتىلدى، ەل ەستىپ، دامەلەنىپ وتىر. ال ەندى نە بولادى، مۇنداي شەشىم حالىقتىڭ كوڭىلىن سۋ سەپكەندەي باسارى ءسوزسىز. وعان سەنىمدىمىن. كوبىسى ءوزىن الداپ كەتكەن سەكىلدى سەزىنۋى مۇمكىن. مۇنداي بىرجاقتى شەشىم بولماۋى كەرەك دەپ سانايمىن. سوندىقتان سالىمشىنىڭ ءار كاتەگورياسىنا سايكەس شەكتى كولەمدى بەلگىلەۋدى ۇسىنامىن. زەينەتكە شىققان جاسىنا، تابىسىنا، زەينەتاقى الۋ قۇقىعىنا، باسپاناسى بار-جوعىنا قاراي يكەمدەپ، بۇل مولشەردى ەسەپتەۋدىڭ ءبىر جۇيەسىن ءتۇزۋدى ۇسىنامىن، – دەدى امانجان جامالوۆ.

سوڭعى جاڭالىقتار