9 جەلتوقسان, 10:45 322 0 مادەنيەت انار لەپەسوۆا

قازاقستاندىق بالەرينا تمد سىيلىعىنىڭ لاۋرەاتى اتاندى

تانىمال قازاقستاندىق بالەرينا، «استانا وپەرا» جەتەكشى ءسوليسى، قازاقستاننىڭ ەڭبەك سىڭىرگەن قايراتكەرى ايگەرىم بەكەتاەۆا تمد-نىڭ «دەبيۋتتەر دوستاستىعى» جاستار سىيلىعىنىڭ لاۋرەاتى اتاندى. ماراپاتتاۋ ءراسىمى بۇگىن، 9 جەلتوقسان كۇنى، بەلارۋستەگى برەست اكادەميالىق دراما تەاترىندا وتەدى.

سىيلىققا قازاقستان، رەسەي، ءازىربايجان، ارمەنيا، بەلارۋس، قىرعىزستان، مولدوۆا، تاجىكستاننان 26 نومينانت ۇسىنىلدى. شىعارماشىلىق جەتىستىكتەرى ونەردىڭ ءار سالاسىن دامىتۋ مەن دارىپتەۋدە ەلەۋلى ۇلەس بولعان دوستاستىق ەلدەرىنىڭ سەگىز مادەنيەت قايراتكەرى حالىقارالىق قازىلاردىڭ شەشىمىمەن سىيلىقتىڭ لاۋرەاتى اتاندى. سىيلىق تمد-دا مادەنيەت جىلى دەپ جاريالانعان 2018 جىلدىڭ قورىتىندىسى بويىنشا بەرىلدى.

- وسى سىيلىقتىڭ قۇرىلتايشىلارىنا ماعان بىلدىرگەن سەنىمدەرى مەن شىعارماشىلىعىما بەرگەن جوعارى باعالارى ءۇشىن العىسىمدى بىلدىرەمىن. ءارتىس ءۇشىن ءاربىر ساحناعا شىعۋ – ۇلكەن باقىت، كورەرمەندەردى قۋانتۋ، ورىنداۋشىلىق شەبەرلىكتىڭ جاڭا قىرلارىن اشۋ مۇمكىندىگى. مۇنداي ماراپاتتار ءبىزدى جاڭا بەلەستەردى باعىندىرۋعا شابىتتاندىرادى. كلاسسيكالىق بي جانكۇيەرلەرىنە بالەت ونەرىنە دەگەن شەكسىز ماحابباتى مەن قولداۋلارى ءۇشىن كوپ راقمەت ايتامىن، - دەپ اتاپ ءوتتى ايگەرىم بەكەتاەۆا.

«دەبيۋتتەر دوستاستىعى» حالىقارالىق سىيلىعى تاۋەلسىز مەملەكەتتەر دوستاستىعىنا قاتىسۋشى مەملەكەتتەردىڭ گۋمانيتارلىق ىنتىماقتاستىق جونىندەگى كەڭەسى جانە حالىقارالىق گۋمانيتارلىق ىنتىماقتاستىق قورىمەن 2008 جىلى قۇرىلعان بولاتىن. قۇرىلتايشىلارمەن انىقتالاتىن گۋمانيتارلىق سالالارداعى اتالمىش سىيلىق جىل سايىن جاس ماماندارعا (35 جاسقا دەيىن) تابىستالادى. سىيلىق بەرىلە باستاعان جىلداردىڭ ىشىندە ونى اقىندار، دارىگەرلەر، ۇستازدار، عالىمدار، تاريح جانە مادەنيەت ەسكەرتكىشتەرىن قورعاۋ جونىندەگى ماماندار، سپورتشىلار مەن جاتتىقتىرۋشىلار، ءتۋريزمدى ۇيىمداستىرۋشىلار يەلەنگەن.

2019 جىلعى تمد-نىڭ مادەني استاناسى برەستتەگى سالتاناتتى ءراسىم جىل بويىنداعى ءىس-شارالار باعدارلاماسىن تۇيىندەيدى. وسى كەشتە شىمكەنت قالاسى قۇرمەتتى مارتەبە ەستافەتاسىن قابىلداپ، 2020 جىلى دوستاستىقتىڭ مادەني استاناسىنا اينالماق.

سوڭعى جاڭالىقتار