9 جەلتوقسان, 10:25 396 0 ەكولوگيا انار لەپەسوۆا

اركتيكاعا مەحانيكالىق كولىكسىز بارعان العاشقى ادامداردىڭ ساياحاتى ءساتتى اياقتالدى

سولتۇستىك پوليۋسكە قىستا مەحانيكالىق كولىكسىز بارعان العاشقى ادامدار – نورۆەگيالىق بورگە ۋسلاند پەن وار تۋماسى مايك حورننىڭ ساياحاتى ءساتتى اياقتالدى.

ەكسپەديتسيا قىركۇيەكتىڭ اياعىندا باستالدى. زەرتتەۋشىلەر پوليار تۇنىندە مۇزدىڭ بەتىمەن 1800 شاقىرىم ءجۇرىپ ءوتتى. بۇل تۋرالى ۆۆس حابارلادى.

ەكسپەديتسيانىڭ ماقساتى – اركتيكا مۇزدارىنىڭ ەرۋى تۋرالى اقپاراتتار جيناۋ. عالىمدار بۇل قۇبىلىستى جاھاندىق جىلىنۋمەن بايلانىستىرىپ وتىر.

زەرتتەۋ جۇمىستارى قاراشانىڭ ورتاسىندا اياقتالۋى ءتيىس ەدى، الايدا ۋسلاند پەن حورن اۋا تەمپەراتۋراسىنىڭ قۇبىلۋى مەن جىلجىمالى مۇزدارعا بايلانىستى كەستەدەن قالىپ قويدى. جۇما كۇنى ولاردىڭ تاماعى ءبىتۋى كەرەك ەدى، ولارعا نورۆەگيالىق زەرتتەۋشىلەر بەنگت روتمو مەن الەكساندر گاممە كومەككە كەلدى. بارلىعى بىرگە «لانس» زەرتتەۋ كەمەسىنە دەيىن جەتتى.

ساپار ۇيىمداستىرۋشىسى لارس ەببەسەن سپۋتنيكتىك بايلانىس ارقىلى ەكى توپپەن دە حابارلاسىپ وتىردى. ول جۇما كۇنى بي-بي-سيگە حورن مەن ۋسلاندتىڭ تىكۇشاقپەن ەۆاكۋاتسيادان باس تارتقانىن، بىراق نورۆەگيالىقتارمەن كەزدەسۋگە كەلىسكەنىن مالىمدەدى. ولاردىڭ ازىق-تۇلىگى ءبىتىپ جاتقان، ال جەل كۇننەن كۇنگە كۇشەيە تۇسكەن. داۋىل سالدارىنان بايلانىس ۇزىلسە، ولار اش قالىپ قويۋشى ەدى.

ۋسلاند پەن حورن 23 قىركۇيەكتە مۇز ۇستىندەگى ساپارىن باستادى. ولارعا -40°C-تان +2°C-قا دەيىنگى ارالىقتاعى اۋا تەمپەراتۋراسىنىڭ بىردەن وزگەرۋى كەدەرگى كەلتىرگەن. زەرتتەۋشىلەر بۇعان جاھاندىق جىلىنۋ سەبەپ دەپ تۇجىرىمدايدى، جىلجىمالى مۇزدار ساياحاتشىلاردى ارتقا قاراي الىپ كەتىپ، ساپاردى ۇزارتىپ جىبەرگەن. كەي جەرلەردە مۇز قاباتى ادەتتەگىدەن جۇقا بولعان. حورن ءبىر رەت سۋعا قۇلاپ كەتىپ، قولى مەن مۇرنىن ءۇستىرىپ العان. حورننىڭ ايتۋىنشا، ەكى زەرتتەۋشى دە قاتتى جۇدەپ، ساياحات كەزىندە شارشاعان.

ۋسلاند - 57, حورن – 53 جاستا. زەرتتەۋشىلەر سولتۇستىك پوليۋسكە قىستا مەحانيكالىق كولىكسىز بارعان العاشقى ادامدار رەتىندە تاريحقا ەنەرى ءسوزسىز.

 

سوڭعى جاڭالىقتار