8 جەلتوقسان, 18:16 383 0 مادەنيەت انار لەپەسوۆا

باس قالانىڭ ۇزدىك جاستارى انىقتالدى

نۇر-سۇلتاندا "ەلوردا جاستارى سىيلىعى - 2019" بايقاۋىنىڭ جەڭىمپازدارى انىقتالدى. ءار سالانىڭ ۇزدىكتەرى ماراپاتتالعان كەشكە قالا اكىمى التاي كولگىنوۆ قاتىستى. 

"بۇگىن ەلوردانىڭ ءار سالا بويىنشا ۇزدىك جاس مامانى مەن ءوز ءىسىنىڭ شەبەرىن انىقتاۋدامىز. ەلباسىنىڭ ۇسىنۋىمەن بيىلعى جىل «جاستار جىلى» بولىپ جاريالاندى. وسى ورايدا بۇل شارا جىل بويى اتقارىلعان جۇمىستىڭ قورىتىندىسى دەسەك تە بولادى. ارينە بۇل باعىتتاعى جۇمىستار ءوز جالعاسىن تابا بەرەدى. مەملەكەت ءوز تاراپىنان ءوزىن دامىتامىن دەگەن جاستارعا ءتۇرلى مۇمكىندىكتەر جاساپ وتىر. ءبىزدىڭ جاستارىمىزدىڭ بارلىق سالا بويىنشا اۋىز تولتىرىپ ايتاتىن جەتىستىكتەرى جەتكىلىكتى. بۇنىڭ بارلىعى ەڭبەكتىڭ ارقاسى. نۇر-سۇلتان قالاسى جاستاردىڭ قالاسى، ارماندار ورىندالاتىن قالا. بۇگىندە ءبىزدىڭ استانامىزدى الەم تانيدى، ەلوردامىزدىڭ دامۋىنا جاستاردىڭ قوسقان ۇلەسى زور", - دەدى  التاي كولگىنوۆ.

بايقاۋ جەڭىمپازدارىنا 100 مىڭ تەڭگەنىڭ سەرتيفيكاتى مەن ەستەلىك سىيلىقتار تابىس ەتىلدى.

"مەنىڭ ۆولونتەر بولۋ يدەيام وزىمە مەن بۇل ومىردە كىممىن دەگەن سۇراقتان كەيىن كەلدى. مەن ادامدارعا كومەكتەسۋ ارقىلى، جاقسىلىق جاساعىم كەلدى. مەن ۆولونتەرلىك ىسپەن 2018 جىلدان باستاپ اينالىسىپ كەلەمىن. وسى ۋاقىت ارالىعىندا كوپتەگەن شارالارعا قاتىستىم. بيىلعى جىل بويىنشا ەرەكشە ايتىپ وتەتىن مەن قاتىسقان شارا ول ەلوردادا وتكەن كۇرەستەن الەم چەمپيوناتى. سپورتتىق شاراعا 4 مىڭ سپورتشى قاتىستى، ءبىز سولارمەن تىكەلەي جۇمىس ىستەدىك. مەنىڭ ونداعى مىندەتىم، كەلگەن سپورتشىلاردى اۋەجايدان كۇتىپ الىپ، قوناق ۇيگە جەتكىزۋ. جالپى ۆولونتەرلىك جان-جاقتى سالا. بۇگىن سەنبىلىككە شىعىپ كوشە تازالاساق، ەرتەڭ كومەككە مۇقتاج جانداردىڭ وتباسىنا بارىپ ءۇي جۇمىستارىنا قول ۇشىن سوزامىز", - دەدى ەلوردانىڭ ۇزدىك "جىل ۆولونتەرى" اتانعان №66 مەكتەپ-ليتسەيىنىڭ 11 سىنىپ وقۋشىسى ميراس مۇرات.

ايتۋلى كەشتە ەلىمىزگە بەلگىلى ساحنا جۇلدىزدارى مارجان اراپباەۆا، رينات مالتساگوۆ، امىرە، رۇستەم جۇگىنىسوۆ، دياس ابلاەۆ جانە تاعى باسقالار ونەر كورسەتتى.

"ەلوردا جاستارى سىيلىعى- 2019" بايقاۋىنىڭ جەڭىمپازدارى:

1. ەسترادا – ميراس جۇگىنىسوۆ;
2. عىلىم – قۋانىش ەرساحانوۆ;
3. جۋرناليستيكا – ريزا دانيار;
4. كينو جانە تەاتر – سامات ازىمقۇلوۆ;
5. ۇلتتىق ونەر – اسەل الىبەكوۆا;
6. سپورت – ماديار مۋسايفوۆ;
7. مەملەكەتتىك قىزمەتكەر - تاڭشولپان ەرمانوۆا;
8. الەۋمەتتىك سالانىڭ ۇزدىك قىزمەتكەرى – جۇنىساليەۆتەر وتباسى;
9. قوعامدىق قىزمەت – اسىلبەك ءابدۋراشيتوۆ;
10. ءوندىرىستىڭ ۇزدىك قىزمەتكەرى – سابينا وتاروۆا;
11. زاماناۋي شىعارماشىلىق ونەر – اقبوتا توقتاسىنوۆا;
12. ۇزدىك ستۋدەنت – ابدراۋف ورال;
13. ۇزدىك جاستار تەاترى – "شاڭىراق" تەاترى;
14. جاس كاسىپكەر – ايگەرىم باپانوۆا;
15. جىل ۆولونتەرى – ميراس مۇرات.

سوڭعى جاڭالىقتار