8 جەلتوقسان, 14:07 345 0 مادەنيەت انار لەپەسوۆا

«باستاۋ» كينوفەستيۆالىنىڭ جەڭىمپازدارى انىقتالدى  

VIII ستۋدەنتتىك جانە دەبيۋتتىك حالىقارالىق «باستاۋ»  كينوفەستيۆالى جەڭىمپازداردى جاريالادى.

فەستيۆالدىڭ تاريحىندا العاش رەت قىسقامەتراجدى فيلمدەرمەن  (Bastau Shorts) قاتار دەبيۋتتىك تولىقمەتراجدى (Bastau Debuts) قارتينالار دا باق سىنادى. اتالعان باعدارلاماعا ەۋروپا ەلدەرى، جاقىن جانە الىس شەتەلدەن ونداعان تولىقمەتراجدى فيلم قاتىسقان.

Bastau Debuts تولىقمەتراجدى دەبيۋتتىك فيلمدەر بايقاۋىنىڭ حالىقارالىق قازىلار القاسى قۇرامىندا رەسەيلىك كينورەجيسسەر، ستسەناريست جانە پروديۋسەر ميحايل سەگال (توراعا),  كينوسىنشى روبەرتو كۋەتو (يسپانيا), پروديۋسەر دەنيس ۆاسلين (نيدەرلاند), تەاتر جانە كينو اكتريسا نەللي ۋۆاروۆا (رەسەي), اكتەر جانە پروديۋسەر  فارحات ابدرايىموۆ (قازاقستان) جۇمىس اتقاردى جانە جۇلدەلەردى تومەندەگىدەي ۇلەستىردى:

ۇزدىك فيلمگە گران-پري: «قابىرلەردى قوزعاۋ» (رەجيسسەرى چون سىن-و، وڭتۇستىك كورەيا);

ۇزدىك رەجيسسۋرا جۇلدەسى: «ىڭىرسۋ» (رەجيسسەرى دومينيك سانگما، ءۇندىستان، قىتاي);

قازىلاردىڭ ارنايى جۇلدەسى: «ءماريام» (رەجيسسەرى ءشاريپا ورازباەۆا، قازاقستان);

ۇزدىك ەر ادام ءرولى ءۇشىن جۇلدەسى: ۇلەستىرىلمەدى;

ۇزدىك ايەل ادام ءرولى ءۇشىن جۇلدەسى:

  • «كوڭىلدەن كەتكەن»، اكتريسا يۋديتا فرانكوۆيچ، رەجيسسەرى ميحا ماززيني (سلوۆەنيا، حورۆاتيا، سەربيا);
  • «پاك قىزدار»، اكتريسا دجوي ريگەر (رەجيسسەرى كەرەن بەن رافاەل، يزرايل، فرانتسيا، بەلگيا);

قازىلاردىڭ ارنايى اتالىمى: «ءبارى دە انام ءۇشىن» (رەجيسسەرى مالگوجاتا يمەلسكا، پولشا).

بيىل Bastau Shorts قىسقامەتراجدى فيلمدەر بايقاۋىنا قاتىسۋعا ءوتىنىم جولداعان ۇسىنىمدار بىلتىرعىعا قاراعاندا كوپ كەلىپ تۇسكەن. الەمنىڭ 44 ەلىنەن 360 كارتينا قاتىسقان. فەستيۆالدىڭ حالىقارالىق الەۋەتىنىڭ ارتقانىن وسىدان بايقاۋعا بولادى.

بۇل بايقاۋدىڭ جەڭىمپازدارىن تومەندەگى حالىقارالىق قازىلار القاسى تاڭدادى: رەجيسسەر، ستسەناريست، كينوپروديۋسەر گەلا بابلۋاني (فرانتسيا), اكتريسا رانو شوديەۆا (وزبەكستان), كينو جانە تەاتر اكتەرى الەكساندر پاشكوۆ (رەسەي) جانە رەجيسسەر ءشاريپا ورازباەۆا (قازاقستان). اتالعان بايقاۋدىڭ جۇلدەلەرى تومەندەگىدەي ۇلەستىرىلدى:

ۇزدىك قىسقامەتراجدى دەرەكتى فيلم جۇلدەسى: «اۋىل كۇيى»، رەجيسسەرى اسەل سىدىقوۆا (قىرعىزستان);

ۇزدىك قىسقامەتراجدى انيماتسيالىق فيلم جۇلدەسى: «اقىرى دراماعا تولى»، رەجيسسەرى كەريحا ارنە (لاتۆيا);

ۇزدىك قىسقامەتراجدى كوركەم فيلم جۇلدەسى:  «ساتۋشى»، رەجيسسەرى سرەچيتا داس ء(ۇندىستان);

قازىلار القاسىنىڭ ارنايى جۇلدەسى: «ديپلوممەن اۋىلعا»، رەجيسسەرى سامعار راحىم (قازاقستان).

اتالعان بايقاۋدىڭ كينولەنتالارى ادەتتەگىدەي ستۋدەنتتىك قازىلاردىڭ جۇلدەسىنە تالاسقان. بيىل وعان 7-حالىقارالىق «باستاۋ» كينوفەستيۆالىنىڭ گران-پري يەگەرى الىشەر جادىگەروۆ توراعالىق ەتتى.

ستۋدەنتتىك بايقاۋدىڭ قازىلارى رەجيسسەر لاۋرا تاموشيۋنايتەنىڭ (ليتۆا) «باقىت جانىمنان ءوتىپ بارا جاتقاندا ۇيىقتاپ جاتقام» ءفيلمىن ۇزدىك قىسقامەتراجدى فيلم دەپ تانىپ،  گران-ءپريدى بەردى.  

ال قازىلاردىڭ ارنايى جۇلدەسى مارتينس گاۋسيشتىڭ «كوجەك» (لاتۆيا) فيلمىنە بۇيىردى.

ايتا كەتەلىك، «باستاۋ» كينوفەستيۆالىندە بيىل سونىمەن قاتار جاڭا باعدارلاما Bastau Docs - الەمنىڭ ۇزدىك دەرەكتى فيلمدەرىنە ارنالعان باعدارلاما اشىلعان بولاتىن. باعدارلاما شەڭبەرىندە  10 ەلدەن (يران، قازاقستان، رەسەي، نورۆەگيا، قىرعىزستان، تاجىكستان، گرۋزيا، ارمەنيا، پولشا، بەلارۋس) 10 دەرەكتى فيلم كورسەتىلدى.  باعدارلامانى  تمد ەلدەرى، بالتيكا جانە سكانديناۆيا ەلدەرىنە Multimedia Promotion كينوكومپانياسىنىڭ شۆەتسياداعى، فيلمدەردى ديستريبۋتسيالاۋ مەن ساتىپ الۋ جونىندەگى ديرەكتورى بوريس شۋلمان جۇرگىزدى.

وراز ابىشەۆ اتىنداعى جۇلدە ەكى بىردەي كارتيناعا تابىستالدى.  ءبىرى ۇزدىك دەرەكتى فيلم دەپ تانىلعان ارمەنيا رەجيسسەرى ارسەن اراكەليانعا «اينا ارقىلى» فيلمىنە بەرىلسە، ەكىنشىسى ستۋدەنتتىك كينو باعدارلاماسىنا قاتىسقان رەجيسسەر كاميللا بەردىمۇراتوۆانىڭ «تاقسىر» اتتى دەرەكتى ءفيلمى  ءۇشىن بەرىلدى.

 

سوڭعى جاڭالىقتار