4 جەلتوقسان, 09:38 704 0 دەنساۋلىق انار لەپەسوۆا

جوتەلمەن اۋرۋحاناعا تۇسكەن ءبۇلدىرشىن ەكپەدەن سوڭ قولىنان ايرىلدى

اقمولا وبلىستىق بالالار اۋرۋحاناسىنا تىنىس جولدارىنىڭ اۋرۋىمەن تۇسكەن ەكى جارىم جاستاعى ۇل بالا سول قولىنان ايرىلدى. اناسىنىڭ سوزىنشە، سوڭعى سالعان ەكپەدەن كەيىن بالاسىنىڭ قولى قارايىپ، جان كەتىپ قالعان. اقىرى ءومىرىن امان الىپ قالۋ ءۇشىن كەسۋگە تۋرا كەلىپتى. ەندى باعاسى قىمبات پروتەز الدىرۋدىڭ قامىنا كىرىسكەن انا دارىگەرلەردى سوتقا بەرمەك دەپ حابارلايدى  كتك ارناسى.

تىنىس الۋ جولدارى اۋرۋىمەن اۋرۋحاناعا كەلىپ تۇسكەن باۋىرجاننىڭ بەتى قازىر بەرى قارادى. اتا-اناسى ەكى جارىم جاسقا ەندى تولعان ءبۇلدىرشىننىڭ باسىنان وتكەن جاعدايعا اقمولا وبلىستىق بالالار اۋرۋحاناسىن كىنالى دەپ تانىپ وتىر.

"ول جەردە بالا ەكى اپتا جانساقتاۋ بولىمىندە ەم الدى. وكپەسىنە برونحوسكوپيا جاساپ، تازالادى. سودان كەيىن پالاتاعا اۋىستىردى. پالاتادا سول كۇنى بالانىڭ سول قولىنا كاتەتور ارقىلى انتيبيوتيك سالدى. سول انتيبيوتيكتەن كەيىن بالانىڭ قولى بەس مينۋتتان كەيىن جانسىزدانىپ قالعان", - دەيدى ءبۇلدىرشىننىڭ اناسى اقبوپە قاليلا.

ەكپەدەن كەيىن بالانىڭ ساۋساقتارىنىڭ ۇشى مۇزداي باستاعان. اتا-انانىڭ سوزىنشە، ولار و باستا كەزەكشى دارىگەرگە بالانىڭ جاعدايىن ەسكەرتكەن.

الايدا ول كەلىپ، ءبۇلدىرشىندى قاراپ، قولىن ۋقالاي بەرۋ كەرەك ەكەنىن عانا ايتىپتى. اقىرى سول قولى قارا مۇز بولىپ، ساۋساق ۇشى جابىسىپ، شىنتاققا دەيىن قارايىپ كەتكەن.

"سول جەردە كەزەكشى بولعان دارىگەرلەرگە ەسكەرتتىك، بالانىڭ قولىنا قان جۇرمەي جاتىر، بالام "قولىم اۋىردى" دەپ جىلاپ جاتىر، بالانىڭ قولى مۇزداي بولدى، مۇزداپ بارا جاتىر دەپ. كەلدى، كوردى، قارادى، "ول سولاي بولادى، ماسساج جاساي بەرىڭىز، كەتەدى، قازىر ءبارى جاقسارادى" دەدى", - دەيدى ءسابيدىڭ اناسى.

جاعدايدى باقىلاي المايتىن شاماعا جەتكەندە ەكى جاسار ءسابي ەلورداداعى بالالار اۋرۋحاناسىنا جىبەرىلدى. ال ول جاقتاعى دارىگەرلەر بالانى امان الىپ قالۋ ءۇشىن قولىن كەسىپ تاستاۋعا ءماجبۇر بولدى. دەسە دە وبلىستىق اۋرۋحانا وكىلدەرىنىڭ يايتۋىنشا، جاعدايعا ەكپەنىڭ قاتىسى جوق ەكەن.

اقمولا وبلىستىق كوپسالالى بالالار اۋرۋحاناسىنىڭ باس دارىگەرى ەلەنا يۆانوۆانىڭ ايتۋىنشا، مۇنداي جاعداي بۇرىن سوڭدى بولماعان جانە بالا بۇرىننان بەرى سىرقاتتانىپ جۇرگەن. الايدا اۋرۋى اسقىنىپ كەتكەن.

"ول ءبىزدىڭ ەمشارامىزدان بولعان جاعداي ەمەس. بالا بۇرىننان بەرى اۋىرعان. سول ۇزاق ۋاقىتتان بەرى اسقىنعان سىرقاتى. سەبەبى، ول كۇرە تامىرىندا بولدى", - دەيدى ەلەنا يۆانوۆا.

ءبۇلدىرشىن وسىعان دەيىن دە اۋىرىپ، ەم الىپ شىققان ەكەن. دارىگەرلەر سونىڭ سالدارى دەگەنگە كەلتىرەدى.

ياعني، بۇرىننان كەلە جاتقان سىرقاتىنان بالانىڭ اعزاسى، قان اينالىمى بۇزىلعان دەسەدى.

ءسابيدىڭ اتا-اناسى دارىگەرلەردىڭ سوزىمەن ەش كەلىسپەيدى. ولار جاۋاپتى مەديتسينا ورگاندارىنىڭ ۇستىنەن سوتقا شاعىمدانباق.

سوڭعى جاڭالىقتار