18 قاراشا, 14:36 318 0 ەكونوميكا انار لەپەسوۆا

ۇكىمەت باسشىسى ءۇش ءمينيستردى جازالاۋدى تاپسىردى

ازىق-تۇلىكتىڭ قىمباتتاۋىنا جول بەرگەن اۋىل شارۋاشىلىعى، ۇلتتىق ەكونوميكا، ساۋدا جانە ينتەگراتسيا ۆيتسە-مينيسترلەرى تارتىپتىك جاۋاپكەرشىلىككە تارتىلۋى ءتيىس. بۇگىنگى ۇكىمەت وتىرىسىنىڭ سوڭىندا اسقار مامين وسىلاي مالىمدەدى. 

"پرەمەر-ءمينيستردىڭ كەڭسەسى مەنىڭ اتىما ءۇش كۇن ىشىندە ازىق-تۇلىكتىڭ قىمباتتاۋىنىڭ الدىن الۋ ماسەلەسىنە جاۋاپ بەرەتىن اۋىل شارۋاشىلىعى، ۇلتتىق ەكونوميكا، ساۋدا جانە ينتەگراتسيا ۆيتسە-مينيسترلەرىن تارتىپتىك جاۋاپكەرشىلىككە تارتۋ تۋرالى ۇسىنىس ەنگىزسىن", - دەدى ۇكىمەت باسشىسى.

ۆيتسە-مينيسترلەرمەن قاتار، شىمكەنت، قىزىلوردا، تۇركىستان، الماتى، كوكشەتاۋ، پەتروپاۆل، اقتوبە جانە تاراز اكىمدەرىنىڭ ورىنباسارلارى تارتىپتىك جاۋاپقا تارتىلماق.

"مۇددەلى مەملەكەتتىك ورگاندار قاتارىنان جۇمىس توبىن قۇرىپ، ءبىر اپتا ىشىندە الەۋمەتتىك ماڭىزى بار تاۋارلاردىڭ باعاسىن تۇراقتاندىرۋ بويىنشا قىسقا مەرزىمگە جانە ورتا مەرزىمگە ارنالعان ناقتى شارالار ازىرلەنسىن. رومان ۆاسيلەۆيچ، جۇمىستى باسقارۋدى سىزگە تاپسىرامىن", - دەدى پرەمەر-مينيستر.

اسقار مامين پرەزيدەنت ۇكىمەت پەن اكىمدىكتەر الدىنا الەۋمەتتىك ماڭىزدى ۇلكەن مىندەت قويىپ وتىرعانىن اتاپ ءوتتى.

"وسى تاپسىرمانى ورىنداۋعا باسا نازار اۋدارىپ، بارلىق قاجەتتى شارانى شۇعىل تۇردە ىسكە اسىرۋ قاجەت. الەۋمەتتىك ماڭىزى بار تاۋارلار باعاسىنىڭ وسۋىنە جول بەرمەۋ كەرەك. مەملەكەتتىك ورگاندار مەن اكىمدەرگە جاعدايدى ەرەكشە باقىلاۋدا ۇستاۋدى تاپسىرامىن", - دەدى ول.

ۇكىمەت باسشىنىڭ ايتۋىنشا، وڭىرلەر اراسىندا ەڭ جوعارى باعا ءوسىمى شىمكەنت پەن قىزىلوردا قالالارىندا بايقالعان. بۇل ەكى وڭىردە 19 تاۋاردىڭ جەتەۋى قىمباتتاعان.

ال تۇركىستان، الماتى، كوكشەتاۋ، پەتروپاۆل، اقتوبە جانە تارازدا 19 تاۋاردىڭ بەسەۋىنىڭ باعاسى وسكەن.

"بۇل اكىمدىكتەر، اۋىل شارۋاشىلىعى، ۇلتتىق ەكونوميكا، ساۋدا جانە ينتەگراتسيا مينيسترلىكتەرىنىڭ جەتكىلىكتى جۇمىس جۇرگىزبەي وتىرعانىن كورسەتەدى", - دەدى مامين.

 

سوڭعى جاڭالىقتار