17 قاراشا, 17:11 330 0 كولىك انار لەپەسوۆا

پويىزداعى كورپە-توسەك داۋى: تاسىمالداۋشى كومپانيا جوعارعى سوت شەشىمىن نەگە ورىندامايدى؟

"جولاۋشىلار تاسىمالى" كومپانياسىنىڭ باسىنان داۋ ارىلار ەمەس. جول ءجۇرۋ بيلەتىن قايتارۋ كەزىندە 1000 تەڭگەدەن ۇستاپ كەلگەن كومپانيانىڭ قيتۇرقىلىعى جۋىردا اشكەرەلەنىپ، قۇزىرلى ورىندار 800 ميلليون تەڭگەدەن استام ايىپپۇل سالعان بولاتىن. بيلەتتىڭ جىرى بىتپەي جاتىپ، ەندى پويىزداعى كورپە-توسەكتىڭ توڭىرەگىندە شۋ شىقتى.

وسى ايدا "جولاۋشىلار تاسىمالى" كومپانياسىنىڭ سايتىندا قىزىقتى حابارلامانىڭ شەتى قىلاڭ ەتتى. رەسمي حابارلامانىڭ ماعىناسى "مەردىگەر كومپانيا ستاندارتقا ساي توسەك-جابدىقپەن دەر كەزىندە قامتاماسىز ەتپەگەنى ءۇشىن 1-20 قاراشا ارالىعىندا پويىزبەن قاتىناعان جولاۋشىلارعا 300 تەڭگەدەن قايتارىلادى" دەگەنگە سايادى.

كاسىپكەر، جولاۋشىلار پويىزدارىن ون جىلدان استام ۋاقىت كورپە-توسەكپەن قامتاماسىز ەتىپ كەلگەن "اس-اي" كومپانياسىنىڭ جەتەكشىسى اسقار وماروۆ سوڭعى رەت تەندەرگە بەس جىل بۇرىن قاتىسقانىن، جەڭىسكە جەتكەنىن، الايدا، ءوزى باسشىلىق ەتەتىن كومپانيانىڭ قىزمەت كورسەتۋدەن الاستاتىلىپ وتىرعانىن ايتادى.

"بۇگىندە "جولاۋشىلار تاسىمالى" ەكى جاققا اقشا تولەپ وتىر. سوڭعى ءتورت جىلدا ايىرىلعان پايدامدى سوت شەشىمى بويىنشا مەن ءوندىرىپ كەلەمىن. مەنى شەتتەتسە دە، شىعىن تولەپ وتىرعانى ازداي، تاسىمالداۋ وپەراتورى تاعى ءبىر مەردىگەرگە قىرۋار قارجى تولەپ كەلەدى. تەمىرجول سالاسىندا جاعداي ونسىز دا ءماز ەمەس. الايدا، قاراجاتتى ۇنەمدەپ، زاڭ اياسىندا جۇمىس ىستەۋدىڭ ورنىنا ولار اقشانى بەكەر شاشىپ، ءبىزدىڭ كومپانيانى شەتتەتىپ كەلەدى", - دەيدى "اس-اي" كومپانياسىنىڭ باسشىسى اسقار وماروۆ.

كاسىپكەر بىرنەشە رەت سوتقا جۇگىنگەن ەكەن. بارلىعىن دا سوت وڭ شەشىم شىعارعان. سوت شەشىمدەرى قولدا بولا تۇرا، ءوز تالابىن تولىق ورىنداتا الماي جۇرگەن ول پرەزيدەنت توقاەۆ پەن ۇلتتىق تەمىرجول كومپانياسى باسشىسى مىڭباەۆقا حات جازباقشى.

ايتا كەتەيىك، كىر جۋ كومبيناتى جولاۋشىلار پويىزدارىن توسەك-جابدىقەن قامتاماسىز ەتۋ ءۇشىن كەڭەس جىلدارى قۇرىلعان. جىلدار وتە جابدىقتاردىڭ توزىعى جەتىپ، كاسىپورىن ساتىلىپ كەتكەن. ء"بىز ونى ساتىپ الدىق. جاڭا تەحنيكامەن جابدىقتادىق. 150 ادامدى جۇمىسقا الىپ، ون جىلداي جاقسى جۇمىس ىستەپ كەلدىك. 2014 جىلى "جولاۋشىلار تاسىمالى" اق "ەكسپرەسس" فيليالىنا قاراستى "تالگو" ۆاگوندارىن توسەك-جابدىقپەن قامتاماسىز ەتۋىمىز كەرەك ەدى. الايدا، تاسىمالداۋ وپەراتورى شارتتى بىرجاقتى بۇزىپ، ءبىر پايدامىزدان ايىرىلدىق. سول ءۇشىن بىرنەشە رەت سوتتاستىق تا. بارلىعىندا دا جەڭىسكە جەتتىك. الايدا، ءبىزدىڭ قىزمەتىمىزدى "جولاۋشىلار تاسىمالى" شەتتەتىپ وتىر", - دەيدى كاسىپكەر.

اسقار وماروۆ توقتاپ قالماق ەمەس. ءارى قاراي دا ادىلەت ىزدەيتىنىن جەتكىزدى.

ء"بىر تۇسىنبەيتىنىم - كۆازيمەملەكەتتىك سەكتوردا نەلىكتەن سوت شەشىمىن قۇرمەتتەمەيدى ەكەن؟ تاسىمالداۋ مەكەمەسىنە قاتىستى ەكى جەكە سوت انىقتاماسى شىقتى. ولار بارلىعىن رەتكە كەلتىرۋ كەرەك. ول ەشتەڭە ەمەس، جاۋاپكەر كومپانيا جوعارعى سوتتىڭ شەشىمىن دە پىسقىرىپ وتىرعان جوق. ال شەشىمى ورىندالمايتىن سوت جۇيەسىنەن بىزگە نە پايدا؟، - دەيدى ول.

ەستەرىڭىزدە بولسا، "جولاۋشىلار تاسىمالى" اق سالاسىن رەتتەۋگە تاياۋدا نەمىس ازاماتى ميحاەل كورتيۋم تاعايىندالعان بولاتىن. شەتەل ازاماتىنىڭ ازىرگە كوپشىلىك الدىنا شىعىپ، قانداي جۇمىستار اتقارىپ جاتقانىن ايتا قويمادى. نە بولسا دا، جولاۋشىلاردىڭ تىلەگى بىرەۋ - تاسىمال سالاسىندا ءتارتىپ ورناسا دەيدى.

سوڭعى جاڭالىقتار