16 قاراشا, 20:47 258 0 رۋحانيات انار لەپەسوۆا

سوزاقتا «تاڭبالى تاس» ەسكەرتكىشى اشىلدى

تۇركىستان وبلىسى سوزاق اۋدانىندا «تاڭبالى تاس» تاريحي ەسكەرتكىشىنىڭ اشىلۋ ءراسىمى بولدى. بەتباقدالا توسىندەگى ەسكەرتكىش «اپپاق» جاۋاپكەرشىلىگى شەكتەۋلى سەرىكتەستىگىنىڭ دەمەۋشىلىگىمەن قايتا جاڭعىرتىلدى، دەپ حابارلايدى قازاقپارات.

تاعىلىمى مول شاراعا وسكەلەڭ ۇرپاققا وتان تاريحىن ناسيحاتتاۋ ماقساتىن كوزدەگەن جاس ۇستازدار مەن ولكە تاريحىن تانۋعا قۇمار بەلسەندى جاستار ارنايى قاتىستى. ەسكەرتكىشتىڭ اشىلۋ راسىمىندە سوزاق اۋدانىنىڭ اكىمى سالىحان پولاتوۆ ءسوز الىپ، «تاڭبالى تاستىڭ» قازاق تاريحىندا الاتىن ورنى ايىرىقشا ەكەنىنە توقتالدى. «تۇركى دۇنيەسى ءۇشىن كۇلتەگىن، تونىكوك، بىلگە قاعان جازۋلارى قانداي قۇندى بولسا، قازاق ءۇشىن تاڭبالى تاس تا سونداي قۇندى. «رۋحاني جاڭعىرۋ» باعدارلاماسى اياسىندا قايتا جاڭعىرتۋ جۇمىستارىن جۇرگىزگەن سەرىكتەستىكتىڭ باس ديرەكتورى الەكساندر اۆدەەۆ پەن ۇجىمعا العىس ايتامىن»،- دەدى اۋدان اكىمى.

شارادا سونداي-اق، سوزاق اۋدانىنىڭ قۇرمەتتى ازاماتى سوزاقباي ابدىقۇلوۆ، «قازاتومپروم» ۇاك ءوندىرىس جونىندەگى باس ديرەكتورى داۋرەن قۇنانباەۆ، «اپپاق» جشس باس ديرەكتورى الەكساندر اۆدەەۆ، سوزاق اۋدانىنىڭ ارداگەرلەر كەڭەسىنىڭ توراعاسى قابىلبەك ەسپەنبەتوۆ قازاق تاريحىنىڭ شوقتىعى بيىك ەسكەرتكىشى «تاڭبالى تاس» جايىندا، ونىڭ قۇندىلىعى جونىندە ءسوز قوزعادى.

تاريحشى سۇلەيمەن ءتابىرىزۇلى تاريحتىڭ تۇپقازىعى «تاڭبالى تاس» تۋرالى عالىمداردىڭ دەرەكتەرىن كەلتىرە وتىرىپ كەڭىنەن اڭگىمەلەپ بەردى. «قازاق حالقى عاسىرلار بويى تاريحي دامۋ بارىسىندا كوپتەگەن ادەت-عۇرپى، ءتىلى، ءدىنى ءبىر تۋىستاس رۋ-تايپالاردان قۇرالىپ، حالىق بولعاندىعى بايقالادى. قاسيەتتى «تاڭبالى تاس» - بابالارىمىزدىڭ سان عاسىرلىق ۇلتتى قالىپتاستىرۋ جولىنداعى قاجىماي-تالماي كۇرەسكەن ەرلىك ءىسىنىڭ جەمىسى»، - دەدى سۇلەيمەن ءتابىرىزۇلى.

ايتا كەتەيىك، «تاڭبالى تاس» تاريحي ەسكەرتكىشى 2008 جىلى يۋنەسكو-نىڭ دۇنيەجۇزىلىك مادەني مۇرا تىزىمىنە، 2017 جىلى قازاقستاننىڭ كيەلى جەرلەرىنىڭ گەوگرافياسىنا ەنگەن تاريحي قۇندى جادىگەر سانالادى.

 

سوڭعى جاڭالىقتار