16 قاراشا, 13:36 257 0 زاڭ انار لەپەسوۆا

الاياق ايەل قارجى پيراميداسىن قۇرىپ، ازاماتتاردىڭ 60 ملن تەڭگەسىن جىمقىرعان

نۇر-سۇلتان قالاسىنىڭ قۇقىق قورعاۋشىلارى ازاماتتاردى قارجى پيراميداسىنان ساق بولۋعا شاقىرادى.

قالالىق پوليتسيا دەپارتامەنتىنىڭ حابارلاۋىنشا، قازىرگى ۋاقىتتا ساقشىلار قارجى پيراميداسىن قۇردى دەگەن كۇدىكپەن قالا تۇرعىنىن (ايەل) جانە ونىڭ بىرنەشە سىبايلاسىنىڭ ۇستىنەن ءىس جۇرگىزىپ جاتىر. وعان 30 سالىمشىنىڭ پوليتسياعا ارىزدانۋى سەبەپ بولىپ وتىر.

WhatsApp ارقىلى «رەالنىە دوحودى 1»، «رەالنىە دوحودى 2» جانە «تريۋمف» چاتتارىن قۇرعان ايەل استانالىقتار مەن باسقا دا وڭىرلەردە تۇراتىن ازاماتتاردىڭ اقشاسىن جيناپ العان.

«ازاماتتاردىڭ سەنىمىن، قارجىلىق ساۋاتىنىڭ ازدىعىن پايدالانىپ، كۇدىكتى ولاردى بۇل جوبادان ەشقانداي قاۋىپ جوقتىعىن ايتىپ سەندىرگەن. جوباعا اقشا سالعان ادام 5-15 كۇننىڭ ىشىندە 100 پايىزدىق كىرىسكە يە بولاتىنىن العا تارتقان. ازاماتتار وسىلايشا، جوباعا 20 مىڭ تەڭگەدەن 2 ملن تەڭگەگە دەيىن اقشا سالعان. سالىمشىلاردىڭ باسىم كوپشىلىگى اقشاسىن قايتارا الماعان»، – دەپ حابارلادى دەپارتامەنتتەن.

وسىلايشا، تەرگەۋ نۇسقاسىنا ساي، اككى الاياقتىڭ 32 ادامدى الداپ، 60 ملن تەڭگە يەمدەنگەنى انىقتالىپ وتىر. الايدا الدانعانداردىڭ سانى ودان دا كوپ بولۋى مۇمكىن.

«ەگەر ءسىز نەمەسە جاقىندارىڭىز اتالعان قارجى پيراميداسىنا اقشا سالىپ، الدانعان بولساڭىز، بەيبىتشىلىك كوشەسى 19 مەكەنجايىنداعى پوليتسيا دەپارتامەنتىنە جۇگىنۋىڭىزدى سۇرايمىز»، – دەلىنگەن حابارلامادا.

سوڭعى جاڭالىقتار