15 قاراشا, 21:51 327 0 الەۋمەت انار لەپەسوۆا

الماتىدا «مەن جاستارعا سەنەمىن!» رەسپۋبليكالىق جاستار فورۋمى ءوتتى

ءال-فارابي اتىنداعى قازاق ۇلتتىق ۋنيۆەرسيتەتىندە قر تۇڭعىش پرەزيدەنتى كۇنىنە ارنالعان «مەن جاستارعا سەنەمىن!» رەسپۋبليكالىق جاستار فورۋمى ءوتتى. 

فورۋمدى قر ءبىلىم جانە عىلىم مينيسترلىگى، اقپارات جانە قوعامدىق دامۋ مينيسترلىگى، «جاندانۋ الەمى» قورى، «Zhas Otan» جاستار قاناتى، قازاقستان جازۋشىلار وداعى، ءال-فارابي اتىنداعى قازۇۋ جانە الماتى اكىمدىگى ۇيىمداستىردى.

شارانىڭ باستى ماقساتى – يننوۆاتسيا مەن شىعارماشىلىقتى ۇشتاستىرۋ ارقىلى ءپاتريوتيزمدى دامىتۋ. فورۋم ۇيىمداستىرۋشىلارىنىڭ ايتۋىنشا، شارا باعدارلاماسىنا 2013 جىلدان باستاپ ءداستۇرلى تۇردە «قازاقستاننىڭ يننوۆاتسيالىق دامۋىنا قوسقان مەنىڭ ناقتى ۇلەسىم» اتتى ۇزدىك ستۋدەنتتىك يننوۆاتسيالىق جوبالار بايقاۋى، «مەن ءوز ەلىمنىڭ وركەندەۋى ءۇشىن نە ىستەي الامىن؟» اتتى ۇزدىك ەسسە جازۋ، ۇزدىك پوەتيكالىق شىعارما جانە پاتريوتتىق تاقىرىپتاعى اندەر سايىسى كىرەدى. «جىل سايىن ۇيىمداستىرۋ كوميتەتىنە تۇسكەن جوبالار مەن شىعارماشىلىق جۇمىستار سانىنىڭ ارتۋى - بايقاۋدىڭ تانىمالدىلىعى مەن قاجەتتىلىگىنىڭ دالەلى. فورۋم ەل كولەمىندە جاستاردىڭ پاتريوتتىق سەزىمىن، ازاماتتىق جاۋاپكەرشىلىگىن جانە زياتكەرلىك-شىعارماشىلىق الەۋەتىن دامىتۋعا باعىتتالعان ماڭىزدى الاڭعا اينالدى»، - دەيدى ۇيىمداستىرۋشىلار.

جاستار جىلى - جاستار باستامالارىن ىنتالاندىرۋعا جانە قولداۋعا جاڭاشا سەرپىن بەردى. فورۋم قورجىنىنا پاراساتتىلىق قاعيداتتارىن ستۋدەنتتىك ورتادا ىلگەرىلەتۋ بويىنشا جوبالار، سونداي-اق جۇمىس ىستەيتىن جاستار وكىلدەرىنىڭ يدەيالارى قوسىلدى. «بيىل ۇيىمداستىرۋ القاسىنا بايقاۋعا قاتىسۋ ءۇشىن ەلىمىزدىڭ بارلىق ايماعىنداعى 100-دەن استام جوعارى وقۋ ورنىنان 1,5 مىڭنان استام ءوتىنىش كەلىپ ءتۇستى. ونىڭ ىشىندە جەكە جوبالار مەن شىعارمالار، سونىمەن قاتار ۇجىمدىق شىعارماشىلىق جۇمىستار دا بار. بەدەلدى ساراپشىلاردان، قوعام قايراتكەرلەرىنەن، مەملەكەتتىك قۇرىلىم، باق پەن بيزنەس وكىلدەرىنەن، عالىمدار، ءدىن، مادەنيەت جانە ونەر قايراتكەرلەرىنەن قۇرالعان تاۋەلسىز قازىلار القاسى كەلىپ تۇسكەن جۇمىستار ىشىنەن 620-دان استام ۇزدىك جۇمىستى تاڭداپ الدى»، - دەپ اتاپ ءوتتى ۇيىمداستىرۋشىلار.

بايقاۋ جەڭىمپازدارى مەن جۇلدەگەرلەرى ديپلومدارمەن جانە باعالى سىيلىقتارمەن ماراپاتتالادى. ءبىرىنشى ورىن يەگەرلەرىنە ءال-فارابي اتىنداعى قازۇۋ-دا ءبىر جىل تەگىن وقۋ گرانتى بەرىلەدى، ۇمىتكەرلەردىڭ شىعارماشىلىق جۇمىستارى ارنايى جيناقتا جارىق كورەدى.

فورۋمنىڭ سالتاناتتى ماراپاتتاۋ راسىمىنە ۆيتسە-پرەمەر ب.م. ساپارباەۆ، سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ءبىرىنشى ورىنباسارى و. بەكتەنوۆ، قر ءبىلىم جانە عىلىم ءمينيسترى ا.ق. ايماعامبەتوۆ، قر اقپارات جانە قوعامدىق دامۋ ءمينيسترى د.ءا. اباەۆ، الماتى ق. اكىمىنىڭ ورىنباسارى ە.ج. باباقۇماروۆ، ءال-فارابي قازۇۋ رەكتورى اكادەميك ع.م. مۇتانوۆ، تانىمال قوعام جانە مەملەكەت قايراتكەرلەرى، ستۋدەنتتەر جانە ەلىمىزدىڭ ءار وڭىرىنەن كەلگەن جاستار قاتىستى.

 

سوڭعى جاڭالىقتار