14 قاراشا, 20:40 352 0 ادەبيەت انار لەپەسوۆا

«كىتاپ وقىپ، رۋحاني باي بول!» بايقاۋى قورىتىندىلاندى

اقتوبە وبلىسىندا  «كىتاپ وقىپ، رۋحاني باي بول!» بايقاۋى قورىتىندىلاندى. «رۋحاني جاڭعىرۋ» باعدارلاماسى اياسىندا قر اقپارات جانە قوعامدىق دامۋ مينيسترلىگىنىڭ باستاماسىمەن ۇيىمداستىرىلعان بايقاۋ 16 قازاندا باستالعان بولاتىن.

شارانىڭ نەگىزگى ماقساتى – «رۋحاني جاڭعىرۋ» باعدارلاماسىن جۇزەگە اسىرۋ، كىتاپقا دەگەن قىزىعۋشىلىق پەن كىتاپ وقۋ مادەنيەتىن ارتتىرۋ، وقىرمانداردىڭ شىعارماشىلىق مۇمكىندىكتەرىن دامىتۋ، قولداۋ كورسەتۋ جانە ۇزدىك كوركەم شىعارمالاردى كەڭىنەن ناسيحاتتاۋ.

بايقاۋعا 150-دەي جالپى ورتا ءبىلىم بەرەتىن مەكتەپ وقۋشىلارى مەن كوللەدج ستۋدەنتتەرى قاتىستى. ءبىرىنشى كەزەڭى كوركەم شىعارمادان ۇزىندىلەردى مانەرلەپ وقىپ، بەينەجازباعا ءتۇسىرىپ، الەۋمەتتىك جەلىلەردە جاريالاۋ ارقىلى وتكىزىلدى. ەكىنشى كەزەڭىنە ىرىكتەلگەن قاتىسۋشىلار كوركەم شىعارمالاردان ءبىر كەيىپكەردىڭ وبرازىن سومدادى.

IMG_0220.JPG

قورىتىندىسىندا كوش ىلگەرى وزىپ شىققان قاتىسۋشىلار جەڭىمپاز اتانىپ، جۇلدەلى ورىندارعا يە بولدى:

ءى ورىن – العا اۋدانى، توقمانساي نم، 2 سىنىپ وقۋشىسى ەلەۋسىز شاحريزات;

ءىى ورىن – بايعانين اۋدانى، قاراۋىلكەلدى وم، 9 سىنىپ وقۋشىسى مەيرامبەكوۆا اقەركە;

ءىى ورىن – اقتوبە مەديتسينالىق كوللەدجىنىڭ 2 كۋرس ستۋدەنتى اكىمالى اينادين;

ءىىى – العا اۋدانى، توقمانساي نم، 3 سىنىپ وقۋشىسى ەرمەكباي اقليما;

ءىىى ورىن – ويىل اگرارلىق كوللەدجىنىڭ ستۋدەنتى نۋرباليەۆ دانيار.

«بايقاۋعا قۋانا-قۋانا قاتىستىم. سەبەبى، مەن كىتاپ وقۋدى وتە جاقسى كورەمىن. اسىرەسە، ا.قۇنانباەۆتىڭ، م.ماقاتاەۆتىڭ ولەڭدەرىن كوپ وقيمىن. كىتاپ وقىعان ادام ءبىلىمدى بولادى. دوستارىمدى كىتاپ وقۋعا شاقىرامىن»، - دەدى ۇزدىك تانىلعان ەلەۋسىز شاحريزات.

جەڭىمپازدار ديپلومدارمەن ماراپاتتالىپ، ءى جۇلدەلى ورىن العان جەڭىمپازعا «مارۆين» كىتاپ دۇكەنىنەن اقشالاي سەرتيفيكات تابىستالدى. بارلىق قاتىسۋشىلارعا كىتاپتار سىيعا بەرىلىپ، العىس حاتتارمەن ماراپاتتالدى.

«رۋحاني جاڭعىرۋ» باعدارلاماسىن جۇزەگە اسىرۋ اياسىندا اقتوبە وبلىسىندا بىرقاتار شارالار اتقارىلۋدا. «Qazaq Epos» قوعامدىق قورىنىڭ باستاماسىمەن وتكىزىلگەن «تۇلپار ءمىنىپ تۋ العان» بايقاۋىندا دا قاتىسۋشىلار ەپوستىق شىعارمالاردى جاتقا ايتىپ، باق سىناعان بولاتىن. جاستاردىڭ ادەبيەتكە دەگەن قىزىعۋشىلىعىن ارتتىراتىن مۇنداي شارالار ءالى دە جالعاسىن تابادى.

سوڭعى جاڭالىقتار