15 قاراشا, 10:39 310 0 ادەبيەت انار لەپەسوۆا

فاريزا وڭعارسىنوۆانىڭ 80 جىلدىعىنا ارنالعان اكتسيا باستالدى

اتىراۋدا پوەزيا پاديشاسى فاريزا وڭعارسىنوۆانىڭ تۋعانىنا 80 جىل تولۋىنا وراي مەكتەپ وقۋشىلارى اراسىندا اقىننىڭ شىعارمالارىن ناسيحاتتاۋعا ارنالعان اكتسيا باستالدى، دەپ حابارلايدى قازاقپارات.

نازارباەۆ زياتكەرلىك مەكتەبىنىڭ وقۋشىلارى قولعا العان بۇل جوباعا وبلىس ورتالىعىنداعى مەكتەپتەر قاتىسۋدا. اتالعان اكتسيا زياتكەرلىك وقۋ ورىنىندا «ۇزدىك فاريزاتانۋشى» وقۋشىلار بايقاۋىمەن باستالدى. بىرنەشە كەزەڭمەن وتكەن ادەبي-تانىمدىق سايىسقا مەكتەپتىڭ 8 وقۋشىسى قاتىستى. الدىمەن ولار اقىنعا ارناۋىن وقىپ، كەيىن فاريزا شىعارماشىلىعىنا نەگىزدەلگەن عىلىمي ەڭبەكتەرىن قورعادى.

ال شەشۋشى كەزەڭدە ءار قاتىسۋشى مەكتەپ شاڭىراقتارىنىڭ قولداۋىمەن پوەزيا پاديشاسىنىڭ ونەردەگى جانە ومىردەگى ساتتەرىنەن ساحنالىق قويىلىمداردى ۇسىندى.

«فاريزا مۇراسىن ناسيحاتتاۋعا ارنالعان شاراعا وقۋشىلار جاقسى دايىندىقپەن كەلگەن. ولار ءسوز ونەرىنىڭ قاسيەتىن، اقىننىڭ بولمىسىنا ءتان شىعارماشىلىق سيپاتتىڭ ءمانىن انىق ۇعىنىپ تۇر»، - دەيدى ونەرلى جاستاردىڭ دايىندىعىن باعالاۋعا كەلگەن حالىقارالىق «شابىت» فەستيۆالىنىڭ باس جۇلدەگەرى، ءادىل-قازىلار القاسىنىڭ مۇشەسى باقىتگۇل باباش.

«ۇزدىك فاريزاتانۋشى» بايقاۋىندا زياتكەرلەردىڭ ساحناداعى ونەرىن ماحامبەت وتەمىسۇلى اتىنداعى اكادەميالىق وبلىستىق قازاق دراما تەاترىنىڭ ءارتىسى ءازىلحان سەرىكبايۇلى دا باعالاۋعا كەلدى. تەاتر مامانى بالالاردىڭ ساحنا مادەنيەتى، جالپى ونەرگە دەگەن قابىلەتتەرىنىڭ جوعارى ەكەنىن ايتادى.

ال ىبىراي التىنسارين اتىنداعى توسبەلگىنىڭ يەگەرى، پەداگوگ اقمارال قامەنوۆا قازىرگى بۋىننىڭ فاريزا شىعارماشىلىعىنا سۇرانىسى ارتىپ كەلە جاتقاندىعىنا ءدان ريزا. «ۇزدىك فاريزاتانۋشى» بايقاۋىنىڭ قورىتىندىسى بويىنشا ۇزدىك كورىنگەن قاتىسۋشىلار ارنايى ديپلومدارمەن ماراپاتتالدى. ال اقىننىڭ 80 جىلدىعىن تويلاۋعا باعىتتالعان ادەبي شارانى ءارى قاراي جالعاستىرۋ قالا مەكتەپتەرىنىڭ ەنشىسىنە بۇيىردى.

بۇل كۇنى شارانى تاماشالاۋعا كەلگەن جالپى ءبىلىم بەرەتىن مەكتەپتەردىڭ وكىلدەرىنە «ۇزدىك فاريزاتانۋشى» بايقاۋىنىڭ شارتتارى مەن ەرەجەلەرى تابىستالدى. وسىلايشا نارىن توپىراعىنان شىققان التى الاشقا ايگىلى قازاق قىزىنىڭ شىعارماشىلىعىنا ارنالعان ادەبي ەستافەتا اقىننىڭ تۋعان كۇنىندە، ياعني 5 جەلتوقساندا، نازارباەۆ زياتكەرلىك مەكتەبىندە قورىتىندىلاناتىن بولدى.

 

سوڭعى جاڭالىقتار