13 قاراشا, 12:33 350 0 الەۋمەت انار لەپەسوۆا

دوساەۆ قازاقستاندىقتاردىڭ اقشا اۋدارىمدارىن تەكسەرۋگە قاتىستى پىكىر ءبىلدىردى

Kaspi Bank ارقىلى اقشا اۋدارىمدارىن جاسايتىن قازاقستاندىقتار سالىق تولەۋگە مىندەتتەلە مە؟ بۇل ساۋالعا ءماجىلىس كۋلۋارىندا ۇلتتىق بانك توراعاسى ەربولات دوساەۆ جاۋاپ بەردى. 

«مەنىڭ پىكىرىمشە، قارجى مينيسترلىگى سالىق سالۋدى كوزدەپ وتىرعان جوق، تەك وسى تولەمدەردەن سالىق تولەنىپ وتىرعانىن كورگىسى كەلەدى. ۇلتتىق بانك پەن مينيسترلىك بىرلەسىپ جۇمىس ىستەۋدە. قولما-قول اقىسىز تولەمدەر كولەمىنىڭ ارتۋى بيۋدجەت كىرىسىنىڭ ارتۋىمەن قاتار ءجۇرۋى ءتيىس دەگەن پىكىردەمىن. بۇل قالىپتى جاعداي. سەبەبى اقشا كولەڭكەدەن شىعادى نەمەسە كولەمى ارتادى. سوندىقتان ۇكىمەتتىڭ فيسكالدىق ماقساتى، جالپى، ءبىزدىڭ كولەڭكەلى ەكونوميكانى تومەندەتۋگە باعىتتالعان جۇمىسىمىز قوسىمشا كىرىستەر تۇرىندەگى جاعىمدى ناتيجەلەرمەن قاتار جۇرگەنىن قالار ەدىك»، - دەيدى دوساەۆ.

سونىمەن قاتار ول قارجى مينيسترلىگىنىڭ ۇسىنىسى Kaspi Bank بويىنشا جاسالاتىن تولەمدەرگە عانا قاتىستى ەمەس ەكەنىن اتاپ ءوتتى.

«بۇل ماسەلە بۇكىل بانك سەكتورىنا قاتىستى. تولەمدەردىڭ قاجەتتى دەڭگەيىن قامتاماسىز ەتۋ تۇرعىسىنان العاندا، بانك سەكتورى ۇكىمەت پەن قارجى مينيسترلىگىنە سەرىكتەس بولاتىن شىعار. ازىرگە بۇل قارجى مينيسترلىگىنىڭ ۇسىنىسى عانا. ازىرگە بانك قوعامداستىعىمەن دە تالقىلانۋدا»، - دەيدى ۇلتتىق بانك توراعاسى.

ەسكە سالا كەتسەك، بۇعان دەيىن قارجى مينيسترلىگى قازاقستاندىقتاردىڭ اقشا اۋدارىمدارى تەكسەرىلۋى مۇمكىن ەكەنىن ەسكەرتكەن بولاتىن. ونداعى ماقسات - سالىق تولەۋدەن جالتارىپ جۇرگەندەردى انىقتاۋ.

سوڭعى جاڭالىقتار